Siglir tar il cuntegn
cuntegn

Chantun Critica per daners da fusiun a Bravuogn Filisur

Il Cussegl grond ha approvà la fusiun da las vischnancas Bravuogn e Filisur. Pliras deputadas e deputads han dentant crititgà la regenza grischuna per ses sustegn generus da las vischnancas.

Purtret da la vischnanca fusiunada da Bravuogn e Filisur.
Legenda: La fusiun da las vischnancas Bravuogn e Filisur è approvada, dentant betg sco usità. RTR

La fusiun da Bravuogn e Filisur è ussa approvada. Ordavant hai dentant dà ina debatta da bun in’ura – quai ch’è nunusità tar talas fatschentas.

Deputadas e deputads han crititgà la summa ch’il chantun dat per la fusiun, numnadamain passa 8 milliuns francs. E quai malgrà ch’il chantun aveva gia sustegnì la vischnanca da Bravuogn cun passa 13 milliuns cura ch’ella era en miserias finanzialas.

Perquai èn 15 politichers s’abstegnids da lur vusch – surtut ord la retscha da la PCD. Il Cussegl grond ha approvà la fusiun cun 100 cunter 0 vuschs.

«Quai na vegni mai pli a dar»

La cussegliera guvernativa Barbara Janom Steiner (PBD) ha mussà ina tscherta capientscha per la critica ed ella ha segirà che la fusiun da Bravuogn/Filisur saja ina situaziun extraordinaria. Ses departament vegnia dentant a guardar fitg bain sin la detta a la suprastanza da la vischnanca fusiunada e controllar las finanzas era en l'avegnir.

Discussiuns er pervi dal rumantsch

Pliras deputadas e plirs deputads han er fatg attent sin la rolla dal rumantsch en il rom da la fusiun. La vischnanca Bravuogn è numnadamain bilingua, la vischnanca da Filisur tudestga. In passus en il messadi da la regenza ha dentant dà da discutar. Sche la cumposiziun da las linguas avess da sa midar entras ina elevaziun nova uschè fitg ch'il rumantsch crudass sut il minimum da 20% po la nova vischnanca decider davart ina adattaziun pussaivla da la lingua uffiziala. Il mument è il rumantsch a Bravuogn mo pauc sur quels 20%.

Tenor Luzi Schutz, il president da la vischnanca fusiunada che va en vigur il 2018 na saja ina nova elevaziun betg planisada il mument, quella che mussa quels bun 20% saja gist vegnida fatga ed uschia fitg actuala. La vischnanca vegnia a s'engaschar per il rumantsch e che quel resta part da Bravuogn Filisur e quai er en scola. Dentant er la populaziun stoppia s'engaschar per il rumantsch, per exempel en furma dad uniuns sco la Pro Bravuogn.

RR novitads 16:00