Cun ina giada aveva la PCS grischuna nagins sezs pli en il Cussegl grond. Quai è stà suenter las elecziuns da l'onn 2000. L'energia ed ils raps per cuntinuar hajan mancà da lezzas uras, uschia Lydia Bapst-Jörger, l'ultima presidenta dals cristiansocials grischuns.
Perquai è la partida vegnida schliada ed ils commembers èn s'orientads ubain vers dretg ubain vers sanester. Ina mesadad saja ida tar ils socialdemocrats e l'autra puspè tar ils cristiandemocrats. Da là nua ch'els eran vegnids.
In pensum permanent
Tenor il president da la PCD grischuna e cusseglier dals stans Stefan Engler saja quai in pensum permanent da mantegnair er quella ala cristiansociala entaifer la PCD. Quai gartegia però bain ed uschia na vesa el, auter che la partida mamma, nagin basegns d'organisar questas vuschs spezialmain entaifer la partida grischuna.
Quai conferma er Gieri Derungs. El è mainafatschenta da la Rait da medis grischuna ed anteriur politicher da la PCS che ha fatg la midada tar la PCD suenter la fin da la partida cristiansociala l'onn 2000.
La PCD è ina partida ch'è tranter dretg e sanester e là avain nus qua en il Grischun era il plaz sco quels ch'eran ina giada en la PCS.
Chapientscha ma er sceptica
Tant Stefan Engler, Gieri Derung sco er Lydia Bapst-Jörger han chapientscha per ils sforzs da dar dapli pais a las vuschs cristiansocialas sin palancà naziunal. Sch'i gartegia però a la PCD da recaltgar vuschs u schizunt commembers tras quai, qua èn tuts plitost sceptics.
RR actualitad 12:00