50% da las Grischunas ed dals Grischuns èn vaccinads. Uschia haja il chantun Grischun cuntanschì sia finamira da vaccinaziun per mez fanadur, di Rudolf Leuthold, il manader da l’Uffizi da sanadad dal chantun.
Jau sun cuntent cun il curs da vaccinaziun actual. Tge che inquietescha mai è ch'il dumber da persunas che vulan sa laschar vaccinar sminuescha.
Ina gronda part da la glieud giuvna na saja anc betg vaccinada. Cunzunt sur las vacanzas da stad hajan blers stuschà lur termin da vaccinaziun.
Motivar da sa laschar vaccinar
En vista a la quarta unda da corona, stuess 70% da la populaziun svizra esser vaccinada enfin l'atun. Cun il svilup da vaccinaziun actual na saja quai dentant betg pussaivel.
Per motivar la glieud da sa laschar vaccinar, vul l'Uffizi da sanadad grischun infurmar pli intensiv davart il virus, esser pli flexibel cun laschar eleger ora ils termins da vaccinaziun ed organisar dapli teams da vaccinaziun mobils per exempel en scolas autas.
Fin october duain tuts esser vaccinads
La finamira dal manader da l’Uffizi da sanadad è da vaccinar tut ils creschids enfin l’october da quest onn en il Grischun.