Radund 900 controllas dals concepts da protecziun ha il chantun Grischun dumbrà las duas davosas emnas. En general mussian las controllas fatgas da las vischnancas ch'ils responsabels d'instituziuns publicas e d'occurrenzas realiseschian bain las mesiras, scriva l'Uffizi chantunal da sanadad. Main bain guardà hajan ils responsabels dentant che la glieud respectia la regla da tegnair distanza.
Buna experientscha cun contact tracing
Il contact tracing saja sa mussà sco mesira fitg effizienta per controllar e franar infecziuns. Uscheditg sco la mesira cun il contact tracing funcziuna, vegn desistì sin ulteriuras mesiras, sco per exempel l'extensiun da l'obligaziun da purtar mascras era en stizuns, ustarias u bars.
Situaziun actuala en il Grischun
Oz ha il chantun annunzià quatter cas novs da corona. Actualmain na sa chatta nagin en in ospital grischun pervi da covid-19. 19 persunas èn dentant en isolaziun e var 50 persunas èn en quarantina.
