Siglir tar il cuntegn
Inhalt

Chantun Convict vegn renovà

Il Cussegl grond ha concedì il credit da 31.4 milliuns francs per renovar il bajetg dal convict a Cuira. Malgrà lungas discussiuns è il resultat la finala stà cler cun 77 cunter 28 vuschs (tar 5 abstenziuns.

Il convict vegn renovà.
Legenda: Il convict vegn renovà. mad

Avant la votaziun hai dentant dà ina debatta animada en il Cussegl grond.

Dapli infurmaziuns, dapli alternativas e pli paucs custs

Che la chasa d'abitar per scolars a Cuira sto vegnir renovada, gliez han tuts acceptà. La critica è plitost sa drizzada vers l'agir da la regenza: Plirs commembers dal Cussegl grond avessan gì gugent dapli infurmaziuns, avessan gì gugent sche la regenza avess preschentà alternativas per il project.

Era il fatg ch'il credit è vegnì pachetà en il quint chantunal 2016 e betg sco tractanda singula cun in messadi, ha disturbà deputadas e deputads. Legalmain possia quest agir bain esser correct - i fissia dentant da giavischar che la regenza chattia ina pratica per tractar tut las fatschentas tuttina.

«Il convict è en in miserabel stan»

Il cusseglier guvernativ Mario Cavigelli (PCD) è sa giustifitgà ed ha surtut accentuà ch'il convict dovria urgentamain ina renovaziun. Surtut ils indrizs sanitars e las installaziuns tecnicas stoppian vegnir adattadas al temp. Il bajetg dal convict datescha da l'onn 1968 e porscha circa 100 letgs.

Il maletg mussa il resultat da la votaziun davart il credit per renovar il convict.
Legenda: In resultat cler per il convict RTR

Sustegn ha Cavigelli survegnì da la cumissiun da gestiun dal Cussegl grond. Lezza ha preparà la fatschenta damai ch'il credit da 31.4 milliuns francs era integrà en il quint chantunal 2016. La votaziun è la finala stada clera - malgrà tutta critica. Era perquai che la fracziun cristiandemocratica e socialdemocratica han vuschà serrà per il credit per renovar il convict a Cuira.

Gia la stad 2018 vul il chantun cumenzar a renovar il convict, che sa chatta sin la spunda sur la citad da Cuira. L'october 2020 duain scolaras e scolars lura pudair retrair il bajetg renovà.

RR actualitad 20.00

Il convict a Cuira - in bischu architectonic (Telesguard 31-03-2016)

Legende: Video Il convict a Cuira - in bischu architectonic abspielen. Laufzeit 03:42 Minuten.
Or da Telesguard dals 31.03.2016.