Siglir tar il cuntegn
cuntegn

Chantun Convict, dretg da burgais e l'areal a Domat

La sessiun da stad dal Cussegl grond ha cumenzà. In zic suar pudessan deputadas e deputads betg mo pervia da las chaliras en sala, mabain era cura ch'i va per ils suandants temas: Il credit per il convict, il dretg da burgais e l'areal da l'anteriura resgia a Domat.

La regenza grischuna durant l'avertura da la sessiun da stad 2017.
Legenda: La regenza e deputadas e deputads han dastgà trair ora blazers e tschops pervia da la chalira en sala. RTR, Nadja Cadonau

En ses pled d’avertura ha il president Michael Pfäffli tematisà ils dretgs fundamentals da la democrazia, sco per exempel la libertad da religiun, d’opiniun, da la lingua u da l’economia. Pfäffli ha era avertì da restrenscher quests dretgs, per exempel cun pretender dapli surveglianza e segirtad ord tema da terror u l’immigraziun. Il president dal Cussegl grond ha concludì ses pled cun in citat da Benjamin Franklin: «Tgi che dat si la libertad, per survegnir segirtad, perda la finala omadus».

Nagina tractanda separada per il Convict

Tranter auter èn deputadas e deputads sa fatschentads cun numerus rapports annuals, tranter auter cun il quint chantunal 2016.

Da discutar ha dà il credit da 31.4 milliuns francs per renovar il convict, la chasa d'abitar per scolars a Cuira. Il motiv è che la regenza n'ha betg previs questa dumonda sco tractanda singula, mabain aifer il quint chantunal 2016. Glindesdi saira ha il Cussegl grond approvà il credit.

Nov dretg da burgais per il Grischun

Il schaner 2018 va en vigur la lescha federala dal dretg da burgais e perquai sto era il Grischun adattar sia lescha. La Confederaziun prescriva per exempel ch'ina persuna da l'exteriur sto avair minimalmain 2 onns ses domicil en in lieu per survegnir il dretg da burgais - il maximum che vischnancas e chantuns pon pretender è 5 onns. La regenza grischuna propona in minimum da 5 onns.

Da nov ston persunas che giavischan il dretg da burgais era savair s'exprimer a scrit en ina lingua chantunala (rumantsch, talian u tudestg). Enfin ussa tanschevan enconuschientschas a bucca.

E la regenza vul reducir obstachels tar fusiuns da vischnancas: Da nov duai esser pussaivel da numnar il lieu da burgais oriund en parentesas. In exempel: Cun la fusiun da la vischnanca da Scuol è in burgais da Sent burgais da «Scuol». Da nov duai esser pussaivel da giavischar omadus lieus: Scuol (Sent).

Chaus cotschens pervia da l'areal a Domat

E puspè vegn la resgia gronda a Domat resp. l'areal d'industria «Vial-Tuleu» ad esser in tema: La cumissiun da gestiun ha analisà la cumpra dals dretgs da bajegar per l'areal. Ella vegn a la conclusiun che la regenza haja agì da principi correct - i dat dentant era puncts critica.

Ina tractanda fixa en la sessiun da stad è era l'elecziun dal presidi e vice-presidi da la regenza per l'onn 2018. Sco president è Mario Cavigelli (PCD) vegnì elegì cun 103 da 107 vuschs. Ses vize è daventà Jon Domenic Parolini (PBD). Actualmain presidiescha Barbara Janom Steiner (PBD) la regenza grischuna.

RR actualitad 12.00