Tar las entradas dal convict a Cuira duain vegnir installadas duas cameras. Quai aveva il Departament d'educaziun, cultura e protecziun da l'ambient relaschà en ina disposiziun generala.
Las cameras sajan impurtantas per pudair garantir la protecziun da las scolaras ed ils scolars, uschia declera il responsabel Christian Ehrbar la decisiun. En cas ch'i dess vandalissem, delicts u violaziun da domicil pudess il material da video gidar da pudair schliar il cas.
Quai vul dentant era dir, ch'il material da video vegn be duvrà lura, cura ch'i schabegia in delict. Las cameras èn nudadas ed ils scolars vegnan sclerids si davart las cameras. Tut il material da video vegn stizzà mintgamai suenter set dis. Sch'i dat nagins recurs cunter las cameras vegnan quellas gia installadas sin la fin da november.