Siglir tar il cuntegn

Chantun Confederaziun sa maschaidia memia fitg, din GR e TI

Il Grischun ed il Tessin sa dostan encunter la tendenza che la Confederaziun sa maschaida adina pli fitg tar il provediment da sanadad dals chantuns. Quai è stà il tenor a l'inscunter dals directurs da sanadad dals dus chantuns.

Purtret da la delegaziun cun otg persunas, mintgamain quatter da mintga vart. Ils Grischunais a sanester ed ils Tessinais da vart dretga.
Legenda: Las duas delegaziuns dal Grischun (sanester) e dal Tessin (dretg). MAD, chantun Grischun

En quest connex èsi er vegnì confermà la buna collavuraziun tar il salvament ed il provediment dals pazients da la Calanca ed il Mesauc. Era tematisà han els l'organisaziun communabla tar eveniments gronds sco era il Care Team ch'il Tessin metta a disposiziun per las duas valladas talianas en il Grischun.

Regiuns perifericas en il focus

Tant Christian Rathgeb sco era ses collega d'uffizi tessinais èn da l'avis ch'i saja vinavant da promover organisaziuns decentralas per garantir la sanadad e la segirezza. Da grond interess per il Tessin saja stà il sistem da provediment cun differents acturs da la sanadad publica ch'il Grischun vivia gia dapi onns cun success.

Provediment da sanadad è chaussa dals chantuns

Ils dus cussegliers guvernativs, Christian Rathgeb e Paolo Beltraminelli, èn perina ch'i vulan sa dustar cunter la tendenza da la Confederaziun da sa maschadar adina pli fitg tar il provediment da sanadad dals chantuns. Plinavant vulan els promover l'organisaziun decentrala a favur da la segirezza e la sanadad. Las delegaziuns vulan approfundar lur collavuraziun e las structuras sumegliantas dals chantuns duain daventar la basa per inscunters communabels regulars.

RR novitads 11:00