Siglir tar il cuntegn

Header

Navigaziun

Ils requirents d’asil minorens betg accumpagnads han basegns divergents da requirents d’asil creschids.
Legenda: Ils requirents d’asil minorens betg accumpagnads han basegns divergents da requirents d’asil creschids. Keystone
cuntegn

Chantun Concept per requirents d’asil minorens betg accumpagnads

L’administraziun chantunala duai elavurar in concept per l’alloschament da requirents d’asil minorens betg accumpagnads. Quai ha decidì il Cussegl grond unanimamain.

Pervia da quai duai lura vegnir stgaffida ina structura da tgira per els. Pajar ils custs per requirents d’asil sto il Chantun. Purtar ils custs per fugitivs (requirents renconuschids) ston dentant las vischnancas.

Per requirents paja il chantun – per fugitivs las vischnancas

Però na duajan betg mo las vischnancas nua che las structuras da tgira vegnan ad esser mabain tut las vischnancas grischunas purtar ils custs. La clav per reparter ils custs è il dumber d’abitants da mintga vischnanca. Vischnancas pli grondas pajan pia dapli, vischnancas pitschna pli pauc. Davent dal 2016 duai tenor la regenza grischuna mintga vischnanca pajar 4 francs per abitant.

Squitsch anc pli grond

Ins saja gia vid quellas lavurs, ha detg il cusseglier guvernativ Jon Domenic Parolini. Quai na bastia però betg ha manegià l’autur da l’incumbensa il deputà liberaldemocrat da Tavau Tarcisius Caviezel envers RTR. Cun la decisiun dal Cussegl grond saja il squitsch sin la regenza da far vinavant cun las lavurs anc ina giada vegnì pli gronds – anc pli gronds che quai ch’el era gia cun il dumber creschent da requirents d’asil.