Per il minister da cultura dal Grischun, Martin Jäger saja quai fauss da discurrer d'art engulà. I sa tractia d'ina dispita interna da la famiglia Giacometti, nua ch'i giaja per la dumonda, tgi che saja il possessur legal da la collecziun.
Questa varianta da l'istorgia refusescha dentant Marco Giacometti, president da la fundaziun Centro Giacometti en Bregiaglia. El haja fiduzia en la fundaziun Giacometti da Paris e sche quella pretendia, che la collecziun saja vegnida engulada, craja el quai, ha el ditg envers RTR.
Tge è capità?
Tenor ina sentenzia dal Tribunal penal federal, ch'ha refusà in recurs encunter la confiscaziun da la collecziun sa tractia tar las skizzas e fotografias dad in regal.
Uschia haja Annette, la dunna dad Alberto Giacometti, regalà las 16 skizzas e 101 fotografias ils onns 1984-1985 ad ina nezza. Quella haja lura regalà enavant questa collecziun dal 1998 ad in passiunà d'art. La firma Priora da l'investider grischun Remo Stoffel haja cumprà il 2009 la collecziun, sin intermediaziun da Beat Stutzer, da quel temp directur dal Museum d'art dal Grischun. Stoffel haja silsuenter emprestà la collecziun per 15 onns al Museum d'art.
La dumonda centrala è damai, sche Annette Giacometti ha propi regalà la collecziun u sche quella è vegnida engulada. Questa dumonda sto ussa sclerir ina dretgira a Paris.
Proceder actual
Il pledader da la Procura publica grischuna, Claudio Riedi, ha confermà che la collecziun saja vegnida confiscada sin giavisch da las autoritads franzosas avant dus onns. Ins spetgia uss sin ulteriurs pass da la Frantscha.
Enfin ch'i dat ina sentenzia resta la collecziun en il tschaler dal Museum d'art a Cuira. Ella è dentant bloccada. Uschespert ch'i dat ina decisiun, pudessan las autoritads franzosas far la dumonda da laschar surdar las ovras.
Exposiziun l'onn 2011 en il Museum d'art dal Grischun
Tar la collecziun confiscada sa tracti da duas mappas cun fotografias e skizzas betg publitgadas da Giacometti – in uschenumnà convolut. L’onn 2011 aveva il Museum d’art dal Grischun festivà il convolut cun ina exposiziun speziala per pudair preschentar las ovras l’emprima giada a la publicitad.
La collecziun haja ina valur dad 1 milliun francs, ha ditg Beat Stutzer envers l’agentura da novitads sda. La collecziun haja dentant anc in'autra valita sper quella finanziala. Ella mussa Alberto Giacometti en muments privats, cun sia famiglia ed amis e vi da la lavur. Cun las datas da las fotografias èsi stà pussaivel d'identifitgar e da datar las ovras.
L'ovra da Giacometti è sin l'entir mund
Oz è la gronda part da l'ovra dad Alberto Giacometti en possess da duas fundaziuns: da la Fondation Annette et Alberto Giacometti a Paris e da la fundaziun Giacometti a Turitg. Ensemen possedan quellas duas fundaziuns 3/4 da tut las ovras. Il rest è en possess privat.
Survista da fundaziuns dad Alberto Giacometti
| Fundaziun | Intent e possess |
|---|---|
| Fondation Alberto et Annette Giacometti, Paris | - tgira il relasch dad Annette, la dunna dad Alberto Giacometti - posseda ca. 5/8 da tut l'ovra, tranter auter 87 purtrets e 482 sculpturas - posseda la gronda part dals dretgs |
| Fundaziun Giacometti, Turitg | - collecziun cuntegna survista cumplessiva da la ovra dad Alberto Giacometti - posseda ca. 1/8 da tut l'ovra, tranter auter 20 purtrets e 170 sculpturas - posseda ina pitschna part dals dretgs |
| Centro Giacometti, Stampa | - tgira l'ierta culturala en Bregaglia - na posseda naginas ovras e nagins dretgs |
RR novitads 06:00+