Plans concrets ha il chantun – che posseda il bajetg – anc nagins. Ina concurrenza d' investiders duai esser l' emprim pass il 2018, declera Markus Dünner, architect chantunal. «Sco preparaziun latiers èsi era necessari da tschertgar il discurs cun la citad da Cuira.» Las pretensiuns per il project sin l' areal dal Sennhof duain citad e chantun lura formular cuminaivlamain.
«Ins vul salvar ina tscherta influenza»
Concurrenza d' investiders – quai na munta tenor Markus Dünner betg che l'areal vegnia simplamain vendì a quel che porscha la pli gronda summa. «Ins vul mantegnair ina tscherta influenza. Quai vul dir che nus sco chantun ed era la citad da Cuita han in interess ch'i vegnia construì insatge ch'è nizzaivel per la citad.» Ina concurrenza d'investiders pussibiliteschia da fixar cundiziuns da basa gia ordavant.
Svidada cumpletta pir 2021 u 2022
Il chantun veglia impedir, che l'edifizi restia vids, accentuescha Dünner. Dentant dettia in problem: La fin dal 2019 bardiglian be ils praschuniers ed ils collavuraturs dal Sennhof a Cazas.
«L'entira procura publica resta anc en il Sennhof. Nus stuain guardar nua che questa vegn plazzada.» En in emprim pass stoppian ils departements ed uffizis dal chantun midar en il nov bajetg da sinergia. Las localitads che vegnian quatras vidas stoppian vegnir renovadas. «Lura pa la procura publica midar en ina da quellas localitads. Dal tuttafatg svidà vegn il Sennhof pir il 2021 u 2022 – guardà realistic.»
RR actualitad 07:00