Siglir tar il cuntegn
Inhalt

Chantun Chavals da Hefenhofen probabel zuppads en il Grischun

Il possessur dal bain puril duai avair transportà animals en il Grischun curt avant che la polizia ha serrà il bain. Quai rapportan las gasettas Südostschweiz e Blick.

schuldà che maina in chaval ord ina susta
Legenda: Il militar ha gidà da salvar e transportar davent ils chavals dal bain a Hefenhofen en il chantun Turgovia. Keystone

Il veterinari chantunal substitut, Giochen Bearth, ha confermà envers 20 Minuten ch'els hajan survegnì indizis per tals transports. Sinaquai haja er dà pliras controllas betg annunziadas. Sin dumonda dad RTR ha Giochen Bearth confermà quellas controllas. Sin las alps giaja quai però bain cun ils animals. I saja usità che animals da la Bassa vegnian sur la stad sin alps grichunas. Dapli n'ha Bearth però betg vulì dir.

Gia pli ditg chavals en il Grischun

Sis chavals dal pur da Hefenhofen sa chattan tenor il portal online da Blick sin l'alp Dürrboden en il Dischmatal sur Tavau. Tenor il pastur sajan ils chavals dapi mez zercladur sin l'alp.

Plinavant haja il pur da Hefenhofen gia dapi blers onns adina puspè chavals sin l'Alp Rüedischtälli. Medemamain in'alp en la regiun da Tavau, però in zic pli zuppada. La sa chattan tenor las indicaziuns ch'il pastur ha fatg a la gasetta Blick ulteriurs 20 chavals da Hefenhofen.