Siglir tar il cuntegn

Header

Navigaziun

Silva Semadeni en il Cussegl naziunal.
Legenda: Silva Semadeni en il Cussegl naziunal. Keystone
cuntegn

Chantun Chaus cotschens pervi da postulat da Semadeni

Rumantsch, rumantsch grischun u idioms. Tge vul Silva Semadeni rinforzar en ses postulat al cussegl federal? Quella dumonda chaschunà discussiuns tranter aderents ed adversaris dal rumantsch grischun.

«Igl è in fatg ch'il rumantsch perda terren - er pervia da las fusiuns da vischnancas sur cunfins da lingua ed er pervia da l'acceptanza difficila dal rumantsch grischun».

Quai è la construcziun en il postulat da la cussegliera naziunala Silva Semadeni al cussegl federal che chaschuna las discussiuns. Tenor Lorenz Alig, president da la Pro Idioms Surselva ha Silva Semadeni numnadamain respundì suandant en in mail a Francestg Friberg, il vicepresident da la Pro Idioms Surselva:

Jau dumonda da far ina bilantscha generala da la situaziun dal rumantsch e da far propostas per cuntinuar e per megliurar la posiziun da nossa quarta lingua - e quai sto capitar er cun rinforzar il rumantsch grischun.
Autur: Silva SemadeniCussegliera naziunala

Pervi da quella construcziun èn la Pro Idioms ed er la Surselva Romontsch da l'avis ch'il postulat ha intenziuns zuppadas. Numnadamain da promover il rumantsch grischun. Quai è er la raschun daco che las uniuns han sustegnì ina resoluziun che sustegn il postulat - dentant be senza la passascha cun il rumantsch grischun.

Martin Candinas retira sustegn

Oriundamain aveva era cusseglier naziunal Martin Candinas suttascrit il postulat. El n'haja sin l'emprim sguard betg vis la problematica. Haja dentant retratg ses sustegn cunquai ch'el saja commember da la Surselva Romontsch sco er da la Pro Idioms Surselva.

Naginas intenziuns zuppadas

Dad intenziuns zuppadas na vul Semadeni dentant savair nagut. Ella pretendi en ses postulat sulettamain in rapport dal Cussegl federal che tira ina bilantscha davart la promoziun da las linguas minoritaras: rumantsch e talian. E cun quai manegi ella ils idioms sco er il rumantsch grischun.

Sustegn da Pro Svizra Rumantscha

La PSR sustegn dentant Silva Semadeni. Il sulet che quinta è da rinforzar il rumantsch. Sche quai saja uss rumantsch grischun u ils idioms na dependi betg, uschia Annetta Zini la co-presidenta da la PSR.

RR actualitad 17:00