Siglir tar il cuntegn
Inhalt

Chantun Chattar bun persunal da tgira resta difficil

Era sch'i dà per il mument avunda persunal da tgira en il Grischun è la situaziun tendida. Perquai vul il nov mainagestiun da la Federaziun grischuna d'ospitals e chasas da tgira lavurar vi da l'attractivitad da la professiun.

Purtret da Daniel Derungs.
Legenda: Daniel Derungs, il nov mainagestiun da la Federaziun grischuna d'ospitals e da chasas da tgira. RTR, Riccarda Müller

Lavurar la fin d'emna ni durant la notg, quai tutga tiers la professiun da tgirunza ni tgirunz. Tant pli impurtant saja quai da porscher bunas cundiziuns als collavuraturs, è il nov mainagestiun da la Federaziun grischuna d'ospitals e chasas da tgira, Daniel Derungs persvas.

I valia da porscher ina buna furmaziun supplementara als collavuraturs e la pussaivladad da sa pudair sviluppar enavant persunalmain. I giaja dentant era per dumondas da cumpetenza – tge pon tgirunz far sez e tgi tgiran els.

Mo cun lavurar vi da l'attractivitad da la professiun vegn la situaziun da persunal en la tgira stabilisada en l'avegnir.
Autur: Daniel Derungsmainagestiun

Quai saja ina gronda sfida per ils proxims onns, ma impurtant cunquai che la populaziun vegnia adina pli veglia.

Dus novs commembers ed ina nova campagna

A la radunanza da commembers ha Daniel Derungs surpiglià il timun da Franco Hübner, Erika Cahenzli-Philipp è vegnida elegida sco vicepresidenta.

En pli ha la federaziun instradà ina nova campagna da communicaziun. E quai cun il scolar fictiv Max che preschenta sur differents chanals las lezias e l’impurtanza da la Federaziun d’ospitals e da chasas da tgira a la populaziun. Max emprenda d'enconuscher la federaziun durant sia tschertga per ina plazza. Dasper il «booklet» electronic da Max datti er el sin Facebook e Twitter nua ch'el preschenta chaussas davart la branscha sociala e da sanadad.

RR novitads 18:00