85 pertschient dals chatschaders èn cunter ina tala midada. Arguments principals cunter la prolungaziun èn che quella saja in exercizi d'alibi da la politica e n'haja nagin niz persistent.
Quai mussa ina retschertga che l'Uniun chantunala dals chatschaders ha fatg tar ses commembers.La retschertga ha l'uniun fatg en il rom da la consultaziun per la revisiun parziala da la lescha da chatscha.
Clar gea a controllas d'alcohol, main cler gea a la patenta per giasts
Plinavant din ils chatschaders cleramain gea a controllas d'alcohol durant la chatscha ed al scumond da traplas. Main clers è il gea tar l'introducziun da patentas per giasts. Be 51% dals chatschaders èn persuenter. Ils adversaris èn dal maini che las patentas per giasts portian dapli squitsch da chatscha e malruaus.
Il chatschaders grischuns beneventan ultra da quai l'introducziun da muniziun senza plum e ch'i duai esser pussaivel en il futur dad ir a chatscha l'october durant il di da la festa grischuna d'engraziament per la racolta. Quai n'è tenor il dretg vertent betg lubì.
Taxa da patenta na duai betg vegnir auzada
l'Uniun chantunala dals chatschaders ha er vulì savair sche la taxa per la patenta duai vegnir auzada sin 800 francs sco il chantun propona ubain sch'i duai dar ina taxa fundamentala cun in daner supplementar per mintga anamal sajettà. Qua èn ils chatschaders grischuns da l'avis che la taxa per la patenta duai restar fixa dentant betg vegnir auzada sch'i dat nagina chatsch'auta l'october.