Mes um, Pieder Hendry, ha la chatscha en ses sang. El vegn dad ina famiglia da chatschaders, ses bab gieva a chatscha. Tut auter è quai tar mai. En mia famiglia na datti nagins chatschaders, da mai na datti naginas fotografias d’uffant cun buis e preda.
Al stan da sajettar vegnin nus beneventads dals collegas chatschaders ed immediat vegn la dumonda, sche jau na veglia betg er daventar chatschadra? Na, grazia.
Sajettà vegn sin ina tavla che mussa in chamutsch, sin ina distanza da 100 meters. La finamira è da sajettar 4 giadas ina suenter l’autra in dad 8, da 9 u da 10. A mes um gartegia quai senza problem – in da 9 e trais da 10:
Igl è schon flot sch’ins gartegia e betg tut va crusch e travers. Jau sun pinà per la chatscha.
Sche ti es gia al stan da sajettar, lura stos er sajettar, din ils collegas da chatscha. Na, jau na vi betg, jau n’hai betg gugent armas ed jau sai che quai fa mal. Nagut datti, ti sajettas. Bun pia, jau giaschel en venter, mes um mussa co ch’igl è da tegnair la buis, jau prend en mira il chamutsch, ma concentresch e sajet...
Il resultat è in sajet perfetg, ina uschenumnada «muscha».
Quel là? Oh meglier na poi betg esser! Lascha cuschinar tes um e va ti a chatscha!
Ils chatschaders èn impressiunads. Sajettar na vegn tuttina betg mes hobi. Jau sun dentant in zic loscha che jau sun stada meglra che mes um e che jau hai mussà als chatschaders passiunads che jau na fiss gnanc uschè ina mala tiradura. Bun, forsa er grazia a la buis drizzada en bain. Mes um banduna il stan da sajettar cun il scrit ch’el dovra per la patenta e cun in bun sentiment dad esser pinà.
RR actualitad 08:00