Gia l'emprim di da chatscha ha ina u l'autra ustaria gia charn da selvaschina sin la carta. Che quella na deriva per il solit betg dal Grischun è cler. Il Metzgertor a Cuira per exempel desista dal tut sin charn indigena. Tenor la possessura Kathrina Jenny na possian ins betg adina esser segir che la qualitad da la charn saja la medema, perquai retiria ella sia charn da selvaschina dad ina tratga en la Nova Zelanda.
En l'ustaria Postigliun ad Andiast datti charn da selvaschina pir davent dals 21 da settember. Per els saja la derivanza da la charn fitg impurtanta. Il possessur Guido Sgier, ch'è vegnì undrà l'onn 2017 sco meglier cuschinier da charn da selvaschina e che va era sez a chatscha, dovra perquai er la charn da la selvaschina ch'el ha sajettà. Plinavant cumpria el er la charn da ses collegas da chatscha.
Tenor Marc Tischhauser, il manader da Gastro Grischun, saja la finala il consument sez quel che decidia, sch'el veglia mangiar charn da selvaschina indigena u betg. Per pudair mangiar la charn da selvaschina dals chatschadurs grischuns, dovria la finala in pau pazienza.
RR actualitad 17:00