Siglir tar il cuntegn

Header

cuntegn

Chatscha Sper il dasch er la plumba – il chatschader daventa controllader

A partir dal 2018 è il chatschader obligà da controllar la charn da ses animal sajettà. Co che quai duess funcziunar, precisescha l’Uffizi da segirezza da victualias grischun en in concept. Quel è actualmain en consultaziun.

La revisiun federala da la lescha da segirezza da victualias prevesa en l'avegnir, ch’era charn selvadia vegn controllada sin malsognas – quai d’ina persuna dal fatg.

Chatschader surpiglia tar selvaschina quai che veterinari fa tar animals da maz

Per la chatscha è quai in problem: Il veterinari na po betg controllar mintga animal avant e suenter ch’el è vegni sajettà. Perquai han las autoritads decidì ch’il chatschader surpiglia l’incumbensa da la persuna dal fatg.

Per il chatschader èn prevesidas intginas midadas:

audio
Bunura: Chatschadur daventa il 2018 era controllader da charn
ord Actualitad dals 09.09.2017.
laschar ir. Durada: 1 minuta 46 Secundas.

  • Marcaziun: È l’animal sajettà, sto il chatschader marcar la preda cun ina plumba vid la tarschola d’Achilles. Uschia èsi pussaivel dad identifitgar l’animal per cas che la charn n'è betg stada en urden.
  • Valitaziun: Durant prender ora il dadens da l’animal sto il chatschader controllar il dadens sin irregularitads. Chatta el talas, sto el inditgar quai sin in formular. Alura vegn contactà il veterinari, e quel controllescha la charn en la mazlaria.
  • Diever privat: Vegn la charn duvrada unicamain per diever privat e betg vendida, sto il chatschader be marcar l’animal.
  • Curs Per ch’il chatschader possia giuditgar la charn tenor la nova prescripziun, porscha il chantun curs. Da frequentar els è facultativ.

Il concept è actualmain en consultaziun tar pliras uniuns pertutgadas – uschia per exempel tar ils mazlers u ils chatschaders. L'infurmaziun detagliada dals chatschaders è planisada a partir dal cumenzament d'enviern.

RR actualitad 07:10

Artitgels legids il pli savens