Durant las trais emnas da chatscha è il vitget da S-charl cumplainamain en ils mauns da chatschaders. Pli u main mintga chamona e chasetta, sco era ils dus hotels èn occupads cun chatschaders. Durant l’enviern vivan mo 2 persunas a S-charl. Durant la chatscha crescha la populaziun sin passa 70.
Il Telesguard va era a chatscha
Durant ils emprims trais dis da chatscha ha il Telesguard documentà, tge che gira tut a S-charl. Saja quai cun accumpagnar chatschaders sin lur posts, cun guardar a l’ustier en cuschina sur las spatlas, ni cun esser da la partida cura ch’il guardiaselvaschina vegn sin visita a mesirar ora las predas ch'èn vegnidas fatgas en il vitg.
Normalmain as tira puspè las tendas sch’ins vesa da quest’aura. Ma tge vul far. Igl è l’emprim di.
Il cumenzament è crudà en l’aua
L’emprima damaun da chatscha è stada tut auter che agreabla. I pluveva a tschiel rut. Sin ils auts hai perfin dà naiv, ed ina tschajera spessa sa ruschnava tras ils guauds. Tuttina han tut ils chatschaders dà a sasez in ruc, prendì il schluppet ed èn ids sin il post. A S-charl sez èsi vegnì ruassaivel per in mument.
Cun l’aura che mida creschan era las schanzas
Cun l’emprima damaun da chatscha senza grond success midan ils protagonists da nossa seria strategia. In va per buns tips tar ses tat ed ils auters turnan enfin sut la tschajera per far chatscha sin chavriels. A S-charl sez vesa il guardiaselvaschina dentant in purtret ch’el n'ha gia daditg betg pli vis l’emprim di da chatscha en la Val S-charl.
Sajettar u laschar viver?
Per ils blers chatschaders è ir a chatscha ina chaussa fitg emoziunala. Per part enconuschan els la selvaschina gia dapi onns. Cura ch’els vegnan tar il punct ch’ins ha la schanza da sajettar, dovra quai era in zic surventschida per insumma dar il culp mortal. Qua u là datti muments che la cumpassiun per l’animal è pli gronda ch’il desideri da far butin.
Telesguard 17:40