Marion Soliva è preparatura d'animals a Maiavilla. Tar ses mintgadi tutga: trair giu la pel, stuppar animals, far trofeas da cornas e restaurar objects vegls.
Ella è la suletta dunna en il Grischun che pratitgescha quella lavur. Tenor ella datti en general adina pli paucas persunas che surprendan il stuppar ora. Motivs èn che bleras persunas vulan betg pli da quels animals vid la paraid ord motivs estetics.
Cumenzà ha ella gia baud ad anatomisar animals. Gia da buoba tagliava ella ils venters da mieurs per guardar tge ch'è en l'intern. Curt suenter la scola ha ella fatg ina scolaziun da quatter onns tar il bab en l'atelier.
Pli tard ha ella lavurà tar la universitad da Turitg en il museum zoologic. En quella plazza ha ella pudì preparar animals exotics, sco per exempel giraffas, kengurus u perfin ossa da mamuts. Vid il project da mamut è ella stada passa dus onns.
Actual prepara ella dapi dus onns animals durant l'avantmezdi. Il suentermezdi ha ella anc ina segunda lavur, sco dunna da service en in hotel. Duas lavurs total differentas che procuran dentant per nagins conflicts. Ella dovria contact cun carstgauns, sch’ins è l'entir di enturn animals morts na vegnian ins betg cuntent a lunga vista.
Nus avain visità Marion Soliva en l'atelier a Maiavilla e preparà cun ella ina vulp:
