Siglir tar il cuntegn

Header

video
Bilantscha dals emprims 9 dis: Sajettà pli pauc selvaschina ch'avant in onn
Or da Telesguard dals 11.09.2018.
laschar ir. Durada: 1 minuta 45 Secundas.
cuntegn

Chatscha Emprims 9 dis chatscha – pli pauca preda ch'il 2017

Chatschadras e chatschaders grischuns han sajettà durant l'emprima part da la chatscha pli paucs animals cumpareglià cun l'onn passà. Tenor il manader da l'Uffizi da chatscha e pestga dal Grischun Adrian Arquint sajan las cifras da quest onn dentant en la media dals onns avant.

La raschun principala ch'igl è l'emprima part da la chatscha vegnì sajettà pli pauca selvaschia è l'aura, uschia il manader da l'Uffizi da chatscha e pestga dal Grischun Adrian Arquint. La tschajera dals emprims dis hajan impedì la vista. Suenter saja la selvaschina lura forsa vegnida spaventada in zic e cun la bell'aura sa retratga. Uschia almain las emprimas tendenzas or da las regiuns. En spezial saja la chatscha da chavriels stada plitost mala. Er pli paucs tschiervs che l'onn passà en vegnidas sajettadas. La chatscha da chamutschs però saja stada in zic meglra.

audio
Mezdi: Chatscha 2018: Bilantscha emprima part cun Adrian Arquint
ord Actualitad dals 11.09.2018.
laschar ir. Durada: 3 minutas 24 Secundas.

Buna chatscha en il Puschlav - main buna en il Grischun Central, Cuira e Scanvetg

Spezialmain pauca preda hajan chatschadras e chatschaders en la regiun da Cuira, en il Scanvetg ed er en il Grischun Central fatg. Meglra chatscha haja dà en il Puschlav. Là saja er la chatscha sin tschiervs stada buna. Er buna saja la chatscha sin taurs da curuna stada. Quella ha gì lieu sco gia l'onn passà durant trais enstagl da mo dus dis. Tenor emprimas cifras ch'Adrian Arquint ha retschavì ord las regiuns sajan bun 30 tschiervs da curuna vegnì sajettads.

Chavriels flaivels

Chatschaders e guardiaselveschinas hajan percurschì ch'i dettia quest onn pli paucs chavriels ch'ils onns passads. Blers sajan morts durant il dir enviern e la stad sitga. Plinavant sajan quels chavriels ch'èn denturn er pli flaivels. Ins stoppia uss spetgar giu enfin la fin da la chatschà e lura analisar sch'ins stoppia prender mesiras per proteger ils chavriels. Tut tenor fissi pussaivel ch'i na dettia quest onn nagina chatscha speziala sin chavriels.

RR actualitad 12:00

Artitgels legids il pli savens