Siglir tar il cuntegn

Header

Il maletg mussa dus chatschaders cun lur perspectivs.
Legenda: Co vai vinavant cun la chatscha supplementara en il Grischun? Keystone
cuntegn

Chantun Chatscha speziala avant Tribunal federal

Oz è in di decisiv per la chatscha grischuna: Ils derschaders dal Tribunal federal a Losanna decidan, sche l'iniziativa che vul scumandar la chatscha supplementara en il Grischun è valaivla u betg.

Cumenzà ha tut l'avust 2013. Lura aveva in comité da chatschaders inoltrà l'iniziativa. Dapi lura vegn discutà, schebain quella è valaivla u betg.

audio
Bunura: Chatscha supplementara avant Tribunal – Mesemna sa decidi
ord Actualitad dals 08.11.2017.
laschar ir. Durada: 2 minutas 51 Secundas.

Abolir la chatscha supplementara

Ils iniziants vulessan midar l'artitgel 11 da la lescha da chatscha uschia, ch'i fiss pussaivel da reglar il dumber da selvaschina senza la chatscha speziala. Durant la chatscha speziala dettia adina puspè scenas che na sajan eticamain betg da responsar, argumentescha il comité d'iniziativa enturn il chatschader e deputà Christian Mathis (PPS).

Sch'il Tribunal federal decida dentant che nossa iniziativa è nunvalaivla, lura è il tema giud maisa.
Autur: Christian Mathis co-iniziant, chatschader e deputà (PPS)

Iniziativa cuntrafetschia al dretg surordinà

La regenza grischuna, il Cussegl grond e la Dretgira administrativa dal Grischun èn da l'avis che l'iniziativa saja nunvalaivla, perquai ch'ella cuntrafetschia a la lescha federala: Senza ina chatscha speziala na possian ins betg cuntanscher la finamira dad evitar tant sco pussaivel donns da selvaschina en ils guauds.

Sch'il Tribunal federal vegn dentant ad in'autra conclusiun e declera l'iniziativa sco valaivla, lura cumenza la procedura politica da nov: La regenza grischuna sto preschentar la fatschenta al Cussegl grond, e silsuenter sto il suveran decider en chaussa.

Expertisas e dispitas emoziunalas

Gia dapi 4 onns vegn discutà e debattà davart senn e nunsenn da la chatscha speziala. La decisiun dal Cussegl grond da declerar l'iniziativa sco nunvalaivla è bain stada clera cun 79 cunter 36 vuschs - ordavant hai dentant dà ina debatta emoziunala.

Era tranter ils chatschaders hai dà discussiuns e renfatschas. Trais commembers da l'Uniun grischuna dals chatschaders da patenta (BKPJV) èn perfin vegnids sclaus da l'uniun, perquai ch'els fan part al comité d'iniziativa.

Ed igl era vegnì preschentà differentas expertisas: Il chantun ha laschà far in'expertisa giuridica dal professer Tomas Poledna, ed ina biologica dal professer Klaus Robin. Ils iniziants han preschentà in'expertisa giuridica dal giurist Michael Kneller da Claustra.

Era l'iniziativa per ina chatscha etica avant dretgira

Medemamain in cas per la dretgira è l'iniziativa per ina chatscha etica. Quella dentant tar la Dretgira administrativa dal Grischun. Ils iniziants enturn Marion Theus han numnadamain fatg recurs encunter la decisiun dal Cussegl grond da declerar l'iniziativa mo per part valaivla.

RR actualitad 07.00

Artitgels legids il pli savens