Durant la chatscha 2019 han chatschadras e chatschaders grischuns gì da far in zic dapli lavur da biro. Els han numnadamain gì d'emplenir ora in formular en connex cun la muniziun da chatscha. L'Uffizi chantunal da chatscha e pestga ha vulì savair diversas chaussas en connex cun la muniziun da chatscha.
Uschia sch'il chatschader dovra muniziun cun u senza plum, tge animals ch'el sajetta cun quella ed er davart il cumportament da l'animal cun sajettar el. Ils resultats mussian che bunamain 75% dals chatschaders sajettia cun muniziun senza plum, di Peter Vonow ch'ha analisà las passa 9'000 unitads da datas.
Chatscha da chavriels cun la pli bassa quota
A chatscha da tschiervs (72%), chatscha da chamutschs (75%) e chatscha da capricorns (73%) van passa 70% da chatschadras e chatschaders gia cun muniziun senza plum. A chatscha da chavriels sajan bun 60% dals chatschaders ids cun muniziun senza plum. Peter Vonow di che quai haja da far cun quai, che blers chatschaders vegls giajan a chatscha da chavriels e quels hajan savens anc muniziun da plum.
Donn da natira cunzunt per ils utschels da rapina
L'entira discussiun da vulair abolir ina chatscha cun muniziun da plum ha da far cun la protecziun d'utschels da rapina. Quels sa nutreschian dal dadens d'in animal selvadi sajettà e quel cuntegnia savens anc particlas toxicas da plum, declera Peter Vonow. Per proteger quels animals ed era la natira giaja il trend adina pli fitg en direcziun da muniziun senza plum. Ozendi saja quella er uschè buna sco quella cun plum – quai che pertutgia la ballistica ed er l'effect da mazzar svelt l'animal.
«Ad in obligatori na stat betg bler en via»
L'Uffizi da chatscha e pestga saja il mument anc vid evaluar pli profund las datas. Sin l'emprima egliada laschia dentant dir, che la muniziun senza plum saja er uschè adattada sco quella cun plum, uschia Adrian Arquint, manader da l'uffizi. Ins possia pia dir ch'i giaja uss segir en direcziun d'in obligatori da muniziun senza plum.
Patronas cun plum fissan lura be pli lubidas sin stans da tir. Decider davart quai stoppia dentant la regenza grischuna. Sin dumonda ha Mario Cavigelli, cusseglier guvernativ responsabel, ditg ch'ins spetgia uss anc giu ils resultats approfundads. El possia anc betg dir, cura e sch'i dettia in tal obligatori. La regenza vegnia dentant a s'occupar pli tard cun la tematica.
