Siglir tar il cuntegn

Header

il vaccin da moderna
Legenda: Anc quest'emna survegn il chantun Grischun 5'000 dosas dal vaccin da Moderna. Keystone
cuntegn

Chantun Grischun Era cun il nov vaccin da Moderna hai num priorisar

Il Grischun resta tar sia politica da priorisar gruppas da risico tar il vaccinar. Quai saja necessari era sche l'interpresa farmaceutica Moderna haja survegnì il mardi l'admissiun da Swissmedic per il vaccin cunter corona – scriva il chantun.

Cun plaschair prendia il chantun per enconuschientscha che la Svizra survegnia in segund vaccin. Quai na veglia dentant betg dir ch'els possian midar en il mument insatge vid la strategia da vaccinar. Perquai ch'er il vaccin da Moderna vegnia furnì en quantitads limitadas, saja vinavant necessari da priorisar las gruppas en mira.

5'000 dosas anc quest'emna

Sco il chantun ha communitgà survegnia el anc quest'emna da la Confederaziun 5'000 dosas dal vaccin da Moderna. En trais emnas suondian alura 7'700 dosas, ed en 6 emnas ulteriuras 10'300 dosas.

A partir dals 20 da schaner possian ils center da vaccinaziun alura pudair vaccinar las gruppas da risico. Ils medis e las medias da chasas ston dentant anc spetgar: avant ils 22 da favrer na possian lezs betg porscher vaccinaziuns. Ina vaccinaziun pli vasta pudess esser pussaivla davent da l'avrigl, sco il chantun scriva.

RTR Novitads 17:00

Artitgels legids il pli savens

Scrollar a sanestra Scrollar a dretga