Siglir tar il cuntegn
cuntegn

Chantun Chantun fa sbagls cun far quints ed ha da sa perstgisar

Pervi da datas elavuradas da maniera sbagliada ha la regenza da curreger las cifras da la gulivaziun da finanzas 2017 e 2018. Quai ha ella communitgà la gievgia avantmezdi. Pertutgadas èn tut las vischnancas grischunas.

Las vischnancas sajan vegnidas orientadas la mesemna, di Thomas Kollegger da l'Uffizi da vischnancas. Il chantun saja conscient dal fatg che las vischnancas pertutgadas «na vegnan betg ad avair plaschair da far pajaments pli gronds respectivamain d'acceptar entradas pli pitschnas», scriva il chantun en si'infurmaziun a las medias.

Legenda: Guardar il video Calculaziuns sbagliadas. Durada 02:41 minutas.
Or da Telesguard dals 26.10.2017.
Il chantun sa perstgisa en tutta furma per las malempernaivladads chaschunadas.
Autur: Barbara Janom Steinerpresidenta da la regenza

Suenter avair chattà in sbagl, è vegnì controllà tut

Ch'i dettia insumma sbagls è vegnì ora cun quai che la vischnanca da San Murezzan ha controllà anc ina giada la basa da datas ch'il chantun ha duvrà per metter en quint ils pajaments per la gulivaziun da finanzas. Suenter ch'il chantun è vegnì infurmà da questa differenza, haja el prendì immediatamain per mauns la chaussa e controllà las datas da tut las vischnancas.

Controlla cumplessiva maina dapli sbagls a la glisch

Tras la controlla da tut las datas èn vegnids ora anc dapli sbagls. Uschia hajan las datas per taglias sin il gudogn e sin il chapital da l'onn fiscal 2015 gia cuntegnì sbagls, infurmescha il chantun.

En il decurs dal midament da sistem tar il sistem nov da la gulivaziun da finanzas sajan vegnidas calculadas las taglias sin basa dad in pe da taglia sbaglià – numnadamain sin basa «dal pe da taglia communal mintgamai vertent» enstagl dal «pe da taglia unitar da la taglia supplementara». Plinavant hajan cuntegnì sbagls er las datas tar las taglias a la funtauna ils onns 2014 e 2015.

Vischnancas survegnan in ulteriur quint dal chantun il december

Ils sbagls han influenzà la calculaziun da la fermezza finanziala da las vischnancas dals onns 2017 e 2018. Quai vul dir per las vischnancas ch'ellas han da calcular danovamain lur budgets.

La regenza ha empruvà da limitar il donn ed ha curregì immediatamain las calculaziuns da la gulivaziun da finanzas 2017 e 2018. Quai vul dir, che la calculaziun oriunda per il 2018 na vala betg pli. Las vischnancas survegnan il december perquai sper il quint da la gulivaziun da finanzas in ulteriur quint per gulivar ils sbagls.

RR novitads 10:00