Siglir tar il cuntegn
cuntegn

Chantun Chantun e vischnancas èn cunter sbassar tschains d'aua

Il Cussegl federal vul sbassar ils tschains d'aua. Da l'onn 2020 enfin 2022 duain ils tschains d’aua vegnir sbassads da 110 sin 80 francs. Suenter duain ils tschains vegnir calculads tenor in model flexibel.

Legenda: Tadlar il audio Saira: Mario Cavigelli e Not Carl – Reacziun sin ils tschains d'aua. Durada 02:58 minutas.
02:58 min, Actualitad dals 22.06.2017.
Purtret da Mario Cavigelli.
Legenda: Cusseglier guvernativ, Mario Cavigelli. RTR

Il cusseglier guvernativ Mario Cavigelli di che la proposta dal Cussegl federal na saja uschia betg acceptabla. I saja grategià als chantuns da muntogna da persvader il Cussegl federal da colliar la discussiun davart ils tschains d’aua cun las discussiuns davart il model nov dal martgà d’electricitad, ma da sbassar ils tschains d’aua sin 80 francs na vegnia per el betg en dumonda.

Cussegl federal suonda concerns

Il Cussegl federal suondia l'argumentaziun dils concerns d'electricitad che repetian incuntin che l'electricitad idraulica haja problems perquai ch'ils tschains d'aua sajan memia auts, Quai na saja betg correct tenor Cavigelli.

In auter punct problematic saja che da la reducziun dals tschains d’aua profitassan era quellas ovras che furneschan lur electricitad als clients da provediment da basa. Sch'in concern haja difficultads lura duain sco emprim ils possessurs star botta per las perditas.

Per Cavigelli è dentant cler ch'ins vegn a stuair discuttar davart in sistem da calculaziun flexibel per ils tschains d'aua per il temp suenter 2022.

Legenda: Guardar il video 35 milliuns pli pauc per il Grischun. Durada 03:27 minutas.
Or da Telesguard dals 22.06.2017.

Not Carl è trumpà e vilà

Ils plans dal Cussegl federal da sbassar ils tschains d’aua ha gia provocà las emprimas reacziuns vehementas or dal Grischun. La regiuns muntagnardas vegnissan uschia chastiadas, è la critica.

Purtret da Not Carl
Legenda: Not Carl, president da la cuminanza d'interess da las vischnancas da concessiun grischunas. RTR, Ruedi Bruderer
Jau sun trumpà! Cunquai pon ils chantuns nua ch’ils concerns d’electricitad èn dachasa sa sanar sin custs dals chantuns da muntogna.
Autur: Not Carlpresident da la cuminanza d'interess da las vischnancas da concessiun grischunas

«Jau sun dischilus», di Not Carl, president da la cuminanza d’interess da las vischnancas da concessiun grischunas. Il chantun Grischun perdess uschia 35 milliuns francs.

Cun sbassar ils tschains d’aua pudessan ils chantuns dals concerns da forza electrica sanar lur concerns d'energia a custs da las regiuns muntagnardas. Quels possian ussa sfruschar ils mauns, di Not Carl.

Il president da la cuminanza d'interess da las vischnancas da concessiun grischunas pretenda transparenza davart ils concerns d’energia. Quels duain metter las cifras sin maisa. Perquai ch'el è anc oz da l’avis che las ovras idraulicas na fan betg deficits. Era vul Not Carl, ch'il parlament valiteschia da nov la valur da la forza idraulica. La valur da l’aua daventa numnadamain adina pli impurtanta. La forza po per exempel vegnir accumulada d’enviern.

Fallida politica d’energia

D'in sbagl fundamental tar las ponderaziuns dal Cussegl federal discurra la Conferenza da las regenzas dals chantuns alpins. Ils problems tar las ovras idraulicas na derivian betg dals tschains d'aua, mabain d'ina politica d'energia fallada scrivan ils chantuns da muntogna.

Critica er da la PCD grischuna

La PCD grischuna refusa las midadas tar ils tschains d'aua proponidas dal Cussegl federal. L'emprim stoppia esser cler cun tge nov model da martgà ch'ils avantatgs da la forza idraulica vegnian remunerads scriva la PCD grischuna. I na dastgia betg esser ch'ils chantuns muntagnards hajan da pajar il pretsch per regulaziuns statalas che mainian ad ina concurrenza betg eguala.

PBD recumonda da lascha la detta

Var 30% damain entradas da tschains d'aua. Quai na giaja betg tenor la Partida burgais-democratica dal Grischun. Uschia reagescha la PBD sin la proposta dal Cussegl federal da reducir il maximum dal tschains d'aua da 110 sin 80 francs per kilowat ils onns 2020 fin 2022. Il Cussegl federal duai laschar la detta dal tschains d'aua uschè ditg ch'i na saja betg cler co il martgà d'electricitad vegnia organisà en il futur.

RR novitads 11.00