Siglir tar il cuntegn
Inhalt

Chantun Cavigelli ha prendì posiziun

Per l'Uffizi federal da l'ambient era l'iniziativa che vul abolir la chatscha speziala confurma a la lescha ed uschia valaivla. Sco la gasetta «Südostschweiz» rapporta, saveva la regenza quai gia avant la votaziun en il Cussegl grond.

Mario Cavigelli cun egliada scheptica
Legenda: Cavigelli durant la debatta en il Cussegl grond davart l'iniziativa che vul abolir la chatscha speziala. Keystone

Il cusseglier guvernativ, Mario Cavigelli, n'aveva dentant betg infurmà il parlament grischun. Gian Michael, schef da fracziun da la Partida burgais-democratica, Vera Stiffler, Partida liberaldemocratica e Marcus Caduff da la Partida cristiandemocratica avessan bugen gì quellas infurmaziuns, sco quai che la «Südostschweiz» ha rapportà.

Cavigelli ha prendì posiziun

Mario Cavigelli n'haja betg fatg public las infurmaziuns da l'Uffizi federal da l'ambient, perquai ch'el haja dà dapli paisa a l'expertisa biologica e giuridica dals agens experts. Plinavant è Cavigelli da l'avis che las infurmaziuns retegnidas n'avessan betg midà l'avis dals deputads.

La profunditad da las explicaziuns dal scriver da l'Uffizi federal da l'ambient n'è betg stà da cumparegliar cun la lavur da noss experts.
Autur: Mario CavigelliCusseglier guvernativ

Il scriver da l'Uffizi federal da l'ambient na saja betg cumparegliabel cun las expertisas da l'expert da selvaschina e las expertisas giuridicas. Cavigelli cumpareglia il dumber da paginas: Il scriver da l'Uffizi federal haja be quatter, l'expertisa da selvaschina dentant 60-70 e l'expertisa giuridica 50-60 paginas.

L'Uffizi federal da l'ambient aveva infurmà Cavigelli...

Mario Cavigelli haja dumandà l'Uffizi federal d'ambient per ses punct da vista davart l'iniziativa che vul abolir la chatscha speziala. En scrit saja el lura vegnì infurmà da l'Uffizi federal d'ambient. Uschia saveva il cusseglier guvernativ che l'iniziativa da chatscha speziala na cuntrafetschia betg a la lescha subordinada.

Legende: Video Pertge n'ha Mario Cavigelli betg mess las chartas sin maisa? abspielen. Laufzeit 00:58 Minuten.
Or da Telesguard dals 29.11.2017.

... Cavigelli n'ha dentant infurmà nagin

Tenor la «Südostschweiz» saveva Cavigelli quai gia in mais avant che l'iniziativa è vegnida discutada en il parlament grischun. La resposta n'haja el dentant betg partì en la cumissiun predeliberanta dal parlament grischun.

Il Cussegl grond aveva declerà l'iniziativa sco nunvalaivla ed ils iniziants han lura tratg vinavant il cas. Sin fundament d'ina decisiun dal Tribunal federal è l'iniziativa da la chatscha speziala valaivla e po uschia vegnir en votaziun.

Per la PPS – in affrunt

La posiziun da l'Uffizi federal da l'ambient n'haja betg plaschì a Mario Cavigelli, cunquai che quella represchentia in avis cuntradictoric a ses agen davart l'iniziativa, crititgescha la PPS l'agir da Cavigelli. Ed era las 11'000 persunas cun dretg da votar che han suttascrit l'iniziativa n'hajan betg impressiunà il cusseglier guvernativ. Tenor la PPS è in tal cumportament in affrunt envers ils burgais dal Grischun. La regenza grischuna saja ida enturn fitg luc cun ils dretgs dal pievel ed haja decidì autoritar. Era in dals iniziants Christian Mathis è da l'avis ch'il cumportament da Cavigelli n'a saja betg stà correct. El avess stuì infurmar. In u l'auter deputà avess uschia forsa er vuschà auter, manegia Mathis.

Evitar polemica

Era il schef da fracziun da la PCD Marcus Caduff conceda che Mario Cavigelli vess stuì infurmar – almain la cumissiun responsabla. Tenor el avess il cusseglier guvernativ stuì communitgar davent da l'entschatta transparentamain per uschia evitar la polemica ch'i dat uss en connex cun l'iniziativa da la chatscha supplementara.

RR novitads 06:00