Siglir tar il cuntegn
cuntegn

Chantun Catechets catolics ed evangelics duain avair medemas pajas

Il president partent dal Corpus catholicum, Luca Tenchio, ha inoltrà il postulat che pretenda che las pajas da catechetas e catechets catolics vegnan adattadas a las pajas dals catechets refurmads. Cun 42 cunter 31 vuschs è ses postulat vegnì approvà. La cumissiun sto uss elavurar in soz da lescha.

Ils delegads dal Corpus catolicum en il Cussegl grond.
Legenda: Ils delegads dal Corpus catolicum han las sesidas en il bajetg dal Cussegl grond. RTR, G. Caviezel

La baselgia evangelica refurmada dal Grischun na fa nagina differenza tranter catechets cun u senza diplom da magister. L'emprim onn d'instrucziun religiusa en scola primara vegn pajà 65.- frs per lecziun e va lura en 10 stgalims enfin 87.- francs per lecziun. La baselgia chantunala catolica propona exact las medemas pajas per catechetas cun diplom da magister. In catechet senza diplom da magister survegn l'entschatta 55.- francs per lecziun. Sin il stgalim 10, il stgalim maximal, survegn el lura dentant era ils 87.- francs per lecziun.

Dictat na fa betg da basegn

Actualmain dat la baselgia catolica dal Grischun ora ina tabella da pajas. Quella tabella è ina directiva e betg lianta per las plaivs. Tar la baselgia chantunala evangelica èn las pajas perencunter liantas e sedrizzan tenor la tabella da pajas da magister dal chantun. Per Placi Berther, il president da la cumissiun d'administraziun na druvassi dentant betg quai «dictat» da surengiu. El è persvas che las plaivs san tge pajas ch'ellas hajan da pajar. Uschiglio ristgian ellas da perder lur catechetas e lur catechets ad autras plaivs.

La cumissiun d'administraziun ha ussa d'ellavurar il sboz da lescha. Quel vegn lura suttamess l'onn proxim a la radunanza generala dal Corpus catholicum.