Il Cussegl federal sustegn ils casinos en regiuns muntagnardas. Uschia pon ils dus casinos a Tavau e San Murezzan a partir l'auter onn avair serrà durant la stagiun bassa.
Il Cussegl federal ha adattà la revisiun da l'ordinaziun che lubescha d'avair serrà il casino fin 270 dis enstagl da 60 sco fin quai. Questa va en vigur l'emprim da mars 2017.
Problems finanzials dapi l'avertura
L’excepziun dal temp d’avertura pertutga cunzunt ils casinos a Tavau e San Murezzan. Ils dus casinos cumbattan dapi lur avertura il pli savens cun problems economics, scriva il Cussegl federal.
Il Cussegl federal è però da l’avis ch’ils casinos èn vinavant impurtants per regiuns muntagnardas. Els augmentian l’attractivitad turistica e sajan ina pitga finanziala per regiuns a l’ur. Plinavant profiteschan er chantun e Confederaziun da las bancas da gieu.
RR novitads 11:30