Siglir tar il cuntegn
Inhalt

Chantun «Carna Grischa è sin curs»

La firma grischuna Carna Grischa saja sin curs, malgrà il moratori provisoric ch'è vegnì lubì. Quai ha il manader da gestiun Martin Niederberger declerà sin dumonda. Uschia haja l'elevatur da charn grischun sez pretendì il moratori.

Auto da furniziun da Carna Grischa
Legenda: In auto da furniziun da Carna Grischa cun anc il vegl logo da la firma grischuna. Keystone

I giaja per pretensiuns enfin il favrer da quest onn, enfin il mument che la firma aveva fatg in nov start. «Nus avain finanzià la nova fatschenta operativa e nus pudain pajar noss quints», di Martin Niederberger. «Il passà che smatga, stuain nus dentant dumagnar cun ina renunzia parziala.»

Cuncurs smanatscha

Enfin mez zercladur ha la Carna Grischa SA ussa temp da preschentar als derschaders in plan da sanaziun. Cas cuntrari smanatscha il concurs. L’interpresa aveva cun in nov logo, in nov schef ed ina nova pagina d’internet vulì meglierar ses num.

Cunter Carna Grischa è plinavant vegnì instradà ina procedura penala pervi da cugliunaria. L'onn passà era vegnì enconuschent che l'interpresa cun sedia a Landquart, ha tranter auter vendì charn da l'exteriur sco charn svizra u charn sdregliada sco charn frestga.