Siglir tar il cuntegn

Header

cuntegn

Chantun Bus da Cuira ha transportà pli paucs passagiers il 2015

Radund 9 milliuns passaschiers ha il Bus da Cuira transportà l'onn 2015. Quai èn 2,4% pli paucs che l'onn avant. La svieuta è creschida levamain sin 22,7 milliuns francs, il gudogn è sa reducì da 68'000 francs l'onn 2014 sin bun 14'000 francs l'onn 2015.

Il motiv per il minus da passagiers è il turissem en Engiadin'Ota. Quai ha il directur dal Bus da Cuira, Alfred Janka, declerà a la conferenza da medias annuala.

Cunquai che pli paucs turists han fatg vacanzas en Engiadin'Ota l'onn 2015 èn era pli paucas persunas idas cun l'Engadin Bus. Uschia han 4,4% damain passagiers duvrà l'Engadin Bus en Engiadin'Ota.

Era a Cuira hai dentant dà in minus dad 1,5%, quai pervi da l'enviern miaivel.

Sguard enavant

Per ils proxims onns ha il cussegl administrativ sviluppà enavant la strategia da l'interpresa. Uschia vul l’interpresa daventar anc pli fitg in'interpresa da servetsch, modernisar sia flotta cun bus pli ecologics e sa sviluppar enavant cun la digitalisaziun.

Il president dal cussegl administrativ, Erwin Rutishauser ed il directur dal Bus da Cuira, Alfred Janka, poseschan davant il bus da Cuira cun in slogan ed in purtret per il giubileum da 20 onns da l'interpraisa.
Legenda: Posar davant in bus da giubileum da 20 onns da l'interpresa. Il president dal cussegl administrativ, Erwin Rutishauser ed il directur dal Bus da Cuira, Alfred Janka. RTR, R. Müller

En quest connex duai quai dar enfin il pli tard il december in nov sistem da direcziun per passagiers. Quels duain vegnir infurmads en temp real sur da partenzas, colliaziuns e retards e quai uschia bain online sco era en ils bus, a las fermativas ed a las staziuns.

Tenor Erwin Rutishauser, il president dal cussegl administrativ, saja il Bus da Cuira era avert da schlargiar ses intschess. Quai surtut sch’i avess da dar ina pussaivladad en la regiun da la Val dal Rain da Cuira.

20 onns Bus da Cuira

L’onn 1995 è l’interpresa vegnida fundada, l’onn 1999 è lura l’Engadin Bus vegnida tiers. Quest onn festivescha l’interpresa ses giubileum da 20 onns, quai tranter auter cun ina campagna da reclama nostalgica.

En il center stattan slogans sco «Dapi 20 onns ta manain nus sch’i plova» e graficas ch’illustreschan quai. Da vesair la campagna èsi tranter auter sin ils bus a Cuira ed en Engiadin'Ota.

RR novitads 12:00

Artitgels legids il pli savens