Siglir tar il cuntegn

Header

Navigaziun

cuntegn

Chantun Bus alpin fa nov record

En las 11 regiuns èn vegnidas transportadas durant ils mais da stad 33'662 persunas, quai ch'è in augment da 2,5% visavi il 2015. Tenor communicaziuns hajan quellas generà entradas d'enturn 2 milliuns francs.

Purtret dal bus alpin sin il pass d'Alvra.
Legenda: Er il bus al Pass d'Alvra ha gì success. MAD

L'Uniun bus alpin vegn finanziada da vischancas, turissem e sponsurs privats e fa accessibel las regiuns allontanadas che na pon betg profitar dad indemnisaziuns publicas. En il Grischun èn 4 regiuns cumpigliadas: L'Alp Flix, Bravuogn, Beverin e la Greina.

En la regiun dal Bergün e dal Pass da l'Alvra ha la nova lingia pudì vegnir realisada. Durant la sesiun da test avevan rodund 400 persunas fatg diever da la purschida. Questa stad sajan quai gia stadas 700 persunas.

Ina bova en la regiun da la Greina e la Valle di Blenio haja chaschunà per ina situaziun speziala. Gia l'entschatta da la sesiun saja la ruta betg pli stada charrabla per ils bus gronds. La fatschenta dals bus Autolinee Bleniesi SA ha reagì cun ina purschida gratuita da taxi. Quel è vegnì duvrà da 5'933 persunas, uschia ch'il record en la Valle di Blenio da 4'972 persunas è rut.

RR novitads 10:00