Gia l'emna proxima, durant la sessiun dal cussegl grond, vul la regenza grischuna infurmar cura che la revisiun per promover l'economia vegn tractada en il parlament. Quai ha il cusseglier guvernativ Jon Domenic Parolini communitgà oz. Sche tut gaja bain, lura possia la lescha ir en vigur il cumenzament da l'onn 2016. La lescha chantunala per promover l'economia sa basa sin il rapport davart l'economia ch'il Cussegl grond ha tractà en sia sessiun dal december 2014. Tranter auter preveda ella in credit dad 80 milliuns francs per sustener investiziuns en l'infrastructura turistica.
Cundiziuns da rama enstagl subvenziuns
Subvenziuns per las branschas en la crisa na sajan betg dumandadas, mabain bunas cundiziuns da basa per l'economia. Quai è stà il tenor da l'emprima maisa radunda tranter represchentants da l'economia, da la regenza grischuna e dals sindicats. En tscherts secturs sajan deregulaziuns necessarias e tut tenor possian ils temps da lavur vegnir flexibilisads.
Lamentims na portan nagut
Lamentar ed organisar acziuns a curta vista na portia nagut. Da quest avis èn patruns e sindicats che han fatg part a la maisa radunda mardi saira. Il Grischun stoppia esser a lunga vista in lieu attractiv per firmas e pudair concurrenzar cun auters.