Siglir tar il cuntegn

Header

Navigaziun

Legenda: Guardar il video Nagina reducziun da taglia per possessurs d'immobiglias. Durada 02:13 minutas.
Or da Telesguard dals 19.10.2015.
cuntegn

Chantun Bunamain unanim per la lescha da taglia

Il Cussegl grond ha decidì la revisiun da la lescha da taglia dal chantun Grischun. Quai cun 105 vuschs gea e naginas vuschs na, tar 3 abstenziuns.

Avant aveva il Cussegl grond gia decidì pliras dumondas da detagl. Uschia ha il Cussegl grond decidì cun 66 cunter 49 vuschs da betg reducir la valur da l’atgna locaziun da 70% sin 60%. Quai era prevesì en la proposta oriunda da la revisiun da la lescha da taglia.

Tenor il president da la cumissiun predeliberanta Urs Marti avess questa reducziun purtà als possessurs d’immobiglias respargns maximals da tranter 120 e 240 francs l’onn. Persuenter avess il chantun stuì stgaffir tranter 5 e 10 novas plazzas.

La maioritad da las deputadas e dals deputads èn suandads l’argument ch’ils respargns da privats na giustifitgeschian betg las expensas supplementaras dal maun public.

Deducziun da pendularis è vinavant valaivla

Ils pendularis grischuns pon vinavant trair giu da la taglia ils custs effectivs ch’els han per pendular a la lavur. Quai ha il Cussegl grond decis cun 88 cunter 26 vuschs.

La cumissiun predeliberanta e la regenza avevan proponì en la revisiun da la lescha da taglia da limitar l’import da trair giu da la taglia sin 9'000 francs ad onn.

Deputadas e deputads èn dentant sa decidids cunter il maini da la cumissiun e la regenza. L’argument principal è stà che las regiuns periferas, nua ch’ins stoppia simplamain pendular, fissan vegnidas dischavantagiadas.

Avertura da la sessiun d'october

En la politica communala, chantunala e federala dovria quai dapli dunnas. Quai ha ditg il president dal Cussegl grond, Vitus Dermont, en ses pled d'avertura da la sessiun d'october.

Che la participaziun da las dunnas stagneschia en il Grischun saja stà da vesair vid las glistas da candidats per las elecziuns dal Cussegl naziunal, cun 47 umens e 23 dunnas.

Vitus Dermont ha plinavant gratulà a tut ils candidats ch'èn vegnids elegids la dumengia passada en il parlament a Berna.

RR novitads 15:00 / 18:00 / 20:00