Siglir tar il cuntegn

Chantun Brand: «Il proceder chat jau propi schlet»

Heinz Brand, il cusseglier naziunal da la PPS, è per gieus olimpics d’enviern en il Grischun. Quai era avant trais onns uschia, e vid questa tenuta n’è sa midà nagut – da principi: Brand crititgescha però fermamain ch’i vegn gia votà il favrer 2017 davart il project.

Il cusseglier naziunal da la PPS Heinz Brand.
Legenda: Tenor Heinz Brand na pon votantas e votants tras l'agir da la regenza grischuna betg «s'infurmar seriusamain». Keystone

Ch'il pievel grischun ha da votar gia il favrer davart gieus olimpics d'enviern vegn crititgà da singuls parlamentaris grischuns a Berna. Sco quai che Heinz Brand da la PPS ha ditg ad RTR, na saja il termin per la votaziun betg elegì bain.

Jau chat quai simplamain schlet ch’ins elegia termins als quals ins na po da principi betg far campagnas d’infurmaziun.
Autur: Heinz Brandcusseglier naziunal
La cussegliera naziunala Silva Semadeni.
Legenda: Silva Semadeni è da l'avis ch'igl è in sforz da gia proponer uss ina candidatura. Keystone

Per la cussegliera naziunala socialdemocratica Silva Semadeni è ina votaziun davart gieus olimpics insumma memia baud. Sut squitsch da temp na possia quai betg dar insatge bun, ha ditg Semadeni. Avant trais onns ha Semadeni cumbattì a la testa cunter ils gieus en Grischun – cun success.

La prescha n'è betg giustifitgada. Nus pudessan forsa pensar al 2030…
Autur: Silva Semadenicussegliera naziunala

RR actualitad 17:00