Siglir tar il cuntegn

Chantun Blers uffizis postals en il Grischun èn periclitads

La Posta svizra annunzia en ina communicaziun, da vulair examinar 20 uffizis postals en il Grischun. Avant aveva il sindicat Syndicom gia publitgà cifras, e discurrì da var 80 plazzas pertutgadas.

Uffizi postal Sursaissa
Legenda: L’uffizi postal Sursaissa/Obersaxen è era periclità tenor la Posta svizra. Keystone

Las 20 postas periclitadas vul la Posta prender sut la marella, quai en stretg contact cun las vischnancas pertutgadas, sco ella scriva. Els veglian cuntanscher il meglier provediment per las regiun. 32 uffizis postals garantescha la Posta da mantegnair almain fin il 2020.

Vinavant vul la Posta augmentar ulteriuras furmas da servetschs, sco puncts d’access per clients da fatschenta u ils automats che porschan in servetsch da 24 uras, “My Post 24”.

Regenza n’ha nagina influenza directa

Il chantun Grischun spera ch’ils responsabels da la Posta examineschan propi mintga serrada d’in uffizi da posta. Ed el spetga che la Posta entria en dialog cun las vischnancas ed auters pertutgads, ha ditg cusseglier guvernativa Jon Domenic Parolini ad RTR.

La qualitad dal service public na dastga betg vegnir diminuida.
Autur: Jon Domenic ParoliniCusseglier guvernativ

Tenor Parolini na dastgan las decisiuns da la Posta betg manar ad ina reducziun da las plazzas da lavur. Dentant la finala haja la Confederaziun in’incumbensa da prestaziun cun la Posta, e betg ils chantuns.

Il proxim temp serran plirs uffizis postals

Gia davent dals 22 da matg resta serrada la posta da Trimmis, enstagl datti in servetsch da chasa. Filialas en collavuraziun cun partenaris datti a S. Bernardino (davent dals 6 da zercladur) ed a Churwalden (davent dals 11 da settember). Avant curt gia serrà sias portas ha l'uffizi postal da Malögia.

Sustegn per ils emploiads pertutgads

La Posta prevesa pliras mesiras per gidar persunas pertutgadas da las serradas, ed els s'engaschian d'evitar relaschadas. Mesiras menziunadas èn ina bursa da plazzas (plazzas libras entaifer la Posta), scolaziuns e sustegn per schliaziuns ordaifer la Posta.

Per il sindicat ina reducziun

Per il sindicat Syndicom n'èn las agenturas postalas ed auters novs servetschs da la Posta nagin remplazzament per uffizis postals serrads, là porschia quella mo in servetsch fitg restrenschì. E sco il Syndicom scriva, fa el quint che var 80 plazzas da lavur van a perder en il Grischun.

RR novitads 12:00