Siglir tar il cuntegn

Chantun Betg tut è lubì per las uniuns a la festa da Cuira

Questa fin d'emna vegn puspè fatg festa a Cuira. I vegn sautà, flanà e natiralmain era mangià e bavì. Per las bun 65 uniuns ina buna chaschun da far in bel daner. I dat dentant bleras prescripziuns tge che dastga vegnir vendì e quant che quai sto custar.

Festa da Cuira
Legenda: Bun 65 uniuns èn preschentas cun lur stans a la festa da Cuira 2016. MAD

Ina biera da mez liter custa 6.50 fr., ina servela 5,50 fr, in hot dog 6,00 fr. Ils pretschs per bler da mangiar e bleras bavrondas èn prescrits durant la festa. Sco quai che la presidenta da la festa da Cuira, Andrea Thür-Suter di, haja quai, tranter auter da far cun fairness. Uschia na dettia betg concurrenza tranter las uniuns.

In’auter aspect quai che pertutga las bavrondas è, che Heineken è in sponsur principal da la festa da Cuira. Uschia èn tuttas uniuns obligadas da vender Calanda sin lur stans.

Ins saja natiralmain pulit lià entras quellas prescripziuns, conceda Ivan Pradella, president dal club da ballape Gelb-Schwarz - in’uniun ch'è gia dapi onns preschenta a la festa da Cuira. Avant intgins onns avevan els empruvà da vender in’autra biera. Il comité d’organisaziun aveva dentant traplà els.

Ch’ils pretschs èn dapertut tuttina vesa Ivan Pradella dentant sco avantatg per las uniuns. Uschia na stoppian ins betg far quitads ch’ina autra uniun porschia il medem product pli favuraivel.

Purschida da chaussas spezialas

Las uniuns ch’èn preschentas a la festa da Cuira dastgan porscher chaussas unicas, chaussas spezialas. Uschia porscha il club da ballape Gelb-Schwarz gia dapi onns pizzoccheri. Tar products unics dastgan las uniuns era fixar sezzas il pretsch.

«Avais vus gia il bindel?»

Legende: Video Festa da Cuira bindel - avais gia el? abspielen. Laufzeit 01:16 Minuten.
Or da RTR dals 17.08.2016.

RTR ha vulì savair da passants, sch'els cumpran u han gia cumprà il bindel cotschen - in bindel da solitaritad. Quel n'è betg obligatoric, duai dentant gidar a segirar la festa finanzialmain er en l'avegnir. L'entrada a la festa da Cuira resta però vinavant gratuita.

Durant la festa vegn il bindel vendì per 10 francs, en la prevendita per otg francs. Fin uss n'èn dentant betg anc vegnids vendids blers bindels. Tenor la presidenta da la festa da Cuira, Andrea Thür-Suter, hajan ins vendì in pèr tschient bindels. La finamira dal comité d'organisaziun è da vender 7'000.

RR actualitad 07:00