Numnasontga è in firà en parts da la Surselva, en il Surses, en la Val d’Alvra, a Domat, en il chantun da Son Gagl ed en il Principadi da Liechtenstein. Il medem temp èn las stizuns a Cuira avertas. Ils onns passads han mussà, che sper ils pendularis vegnan era bleras persunas da las regiuns che han firà quest di cun auto en la citad. Il 2011 hai dà in chaos sin las vias da Cuira: Il traffic steva airi.
Concept da traffic
Cun il concept da traffic «Park & Ride» da la citad da Cuira spera Roland Hemmi, il suppleant dal cumandant da la polizia da la citad da Cuira, da pudair stabilisar il traffic da Numnasontga. Il concept prevesa parcadis gratuits sin l’Obere Au a l’ur da Cuira. Da là parta in bus gratuit che maina ils visitaders en il center da la citad.
Corridor da bus
Roland Hemmi quinta cun circa 250 autos supplementars sin il parcadi da l’Obere Au – che ha totalmain plaz per circa 1'000 autos. Per ch'ils bus che van mintga 15 minutas n'hajan nagin problem da passar, fa la polizia da la citad in corridor per ils bus. Era quai fa part da quest concept da traffic.
RR actualitad 17:00