Siglir tar il cuntegn
cuntegn

Chantun «Betg midà opiniun, mabain far ina pausa ...»

Pervi dals viriveris enturn il museum d'art ha Martin Jäger envidà ils meds da massa per far intervistas. Novas infurmaziuns enturn la direcziun dal museum n'hai betg dà. Entant datti critica per sia moda e maniera da communicaziun.

Legenda: Guardar il video Museum d'art Grischun II – Martin Jäger piglia posiziun. Durada 01:51 minutas.
Or da Telesguard dals 21.06.2017.

Respundì ha Martin Jäger dentant mo a dumondas formuladas ordavant a scrit. Ed era a quellas ha Jäger da risposta be curt e cnap. Per exempel respunda el sin la critica che la communicaziun saja stada minimala ed haja chaschunà confusiun, ch'els hajan adina communitgà quai che saja stà necessari.

Transparenza manca

Ma pertge na vegn betg numnà transparentamain tge ch'è schabegià en la direcziun dal museum d'art a Cuira? Pertge ha Jäger decis da degradar il directur Stephan Kunz al curatur? Ma qua na vul Jäger betg pregiuditgar l'analisa che vegn fatga da la direcziun dal museum d'art. In'emprima analisa externa hai gia dà. Tge vegn ussa pia concret analisà en quella segunda runda? Tar l'organisaziun sajan sa mussadas anc intginas dumondas avertas e quellas sajan ussa d'analisar, di Martin Jäger.

Il squitsch public e politic è stà massiv – era pervia da quai vulain analisar anc ina giada la situaziun.
Autur: Martin JägerCussglier guvernativ (PS)

Kunz è Seeberger èn scrits malsauns

Cura ch'ils resultats da l'analisa èn sin maisa n'ha Martin Jäger betg vulì tradir. Be tant, ha il cusseglier socialdemocratic ditg: Il directur degradà, Stephan Kunz sco era Nicole Seeberger ch'era previsa sco nova directura, sajan scrits malsauns pervi dal stress actual.

«Uschia na pon ins betg communitgar»

Martin Jäger haja segir gì ses motivs per remplazzar il directur dal museum d'art Stephan Kunz. La communicaziun saja dentant stada manglusa – dian plirs politichers. Cunquai ch'el naja betg declerà sia decisiun, vegnia ussa speculà tant pli fitg.

Per mai èsi in desaster da communicaziun.
Autur: Marcus CaduffSchef da fracziun PCD

Betg dal medem avis èn ils schefs da fracziun sch'i va per la dumonda sche la politica sto vegnir activa. Marcus Caduff (PCD) e Gian Michael (PBD) vulessan pli gugent spetgar giu. Auter Rudolf Kunz (PLD) che vuless gugent intervegnir sche l'entira chaussa sa sclerescha betg.

Degradar ina persuna senza declerar ils motivs – quai n'è betg acceptabel.
Autur: Rudolf KunzSchef fracziun PLD

Era la PS – la partida da Martin Jäger – crititgescha che la communicaziun è stada insuffizienta. Il president Philipp Wilhelm differenziescha dentant: I saja bun ch'il Cusseglier guvernativ haja tratg il frain e veglia ussa analisar anc ina giada l'entira organisaziun dal museum d'art dal Grischun.

Cun far in stopp demussa Martin Jäger grondezza.
Autur: Philipp WilhelmPresident PS

La cumissiun da gestiun dal Cussegl grond na vegn il mument betg activa. I saja in process pendent e perquai na saja betg il mument per la GPK d'intervegnir. Quai ha la presidenta Agnes Brandenburger (PPS) confermà sin dumonda dad RTR.

Legenda: Guardar il video Museum d'art Grischun I – Blera irritaziun cun las communicaziuns. Durada 03:25 minutas.
Or da Telesguard dals 21.06.2017.

RR actualitad 17:00