Baselgia e turissem - il potenzial è avant maun

«Ospitalitad vivida - baselgia en il turissem», sut quest titel hai dà ina dieta da represchentants da la Baselgia evangelica e catolica, represchentants da l'economia e dal turissem. La finamira era da dar in sguard sin la situaziun actuala e da far in pass enavant per nizzegiar il potenzial.

la catedrala da Cuira

Legenda da maletgs: La catedrala da Cuira, era ella ha potenzial sco attracziun turistica. RTR, H.Schär

En in referat ha la docenta da la HTW, Barbara Haller Graf, mussà als preschents, ch'ils trends actuals en il turissem, sco per exempel la brama d'ir en la natira, ils interess culturals ni il trend dad ir pli fitg en las regiuns e quai sche pusseivel cun meds publics, muntan er bunas schanzas per il Grischun e las baselgias.

Da quai è era la decana da la baselgia evangelica, Cornelia Camichel Bromeis, persvasa. La baselgia saja averta per ils basegns da tut ils carstgauns, era per ils turists. Durant las vacanzas hajan els forsa magari plitost temp da reflectar.

Internet sto vegnir nizzegià

Per ils turists datti gia ozendi ina vasta purschida sco per exempel viadis da baselgia tar baselgia, pelegrinadis, servetschs divins en la natira, si culm, nozzas en il verd u guids spezials en las baselgias. Tenor Barbara Haller Graf dovra quai dentant er la colliaziun. Il giast vul avair in pachet cumplessiv, pernottaziun cun visita d'ina baselgia per exempel, e quai sto esser en la rait. Vitiers sajan «posts» sin facebook ed instagram la meglra reclama. Quai valia da nizzegiar per porscher al giast occurrenzas ed eveniments per l'olma.

RR actualitad 17:00