Nossa conturn sa mida ad in sa midar. Là nua ch’i era ina giada anc ina pastgira verda èsi oz in center da cumpra ed ord la stalla veglia è vegnì fatg ina nova abitaziun. Per la tgira da monuments èsi dentant impurtant che tscherts bajetgs vegls vegnan protegids. L’uniun «Domus Antiqua» ha organisà a Cuira ina dieta davart il mantegniment e l’utilisaziun da bajetgs vegls.
Cura vegn la tgira da monuments en acziun
Nott Caviezel è president da la cumissiun naziunala per la tgira da monuments e di ch'i na saja betg uschia ch'els veglian mantegnair simplamain tut ils bajetgs vegls. La tgira da monuments saja qua per mantegnair tschertas valurs che noss perdavants han laschà enavos.
Tenor l'istoricher d'architectura sajan ozendi maximalmain 10% dals bajetgs sut protecziun. Per Nott Caviezel èn quels bajetgs dentant vairs stgazis. En quels edifizis chattia ins numnadamain savens l'istorgia d'ina famiglia u perfin d'in entir vitg.
RR actualitad 17:00