Siglir tar il cuntegn
Inhalt

Chantun Avrigl Avrigl! Deposits da sal dal chantun ston vegnir svidads

Tgi che cartì questa istorgia è daventà nar d'avrigl dad RTR. Il sal na vegn betg duvrà dals pasterners ed er per la potenza porta quel nagut.

Purtret dal pasterner Hubert Caduff da Glion cun suravi ina gronda scrittira d'Avrigl avrigl!
Legenda: Avrigl Avrigl! Tgi che ha cartì quest'istorgia è stà noss nar d'avrigl. RTR, Grafica

Durant in enviern normal dovra il chantun radund 15'000 tonnas sal per las vias. L'enviern passà ha el dentant be duvrà radund 7'000 tonnas. En ses deposits ha l'uffizi da construcziun bassa plaz per radund 9'000 tonnas ed ils deposits vegnan durant l'enviern er adina emplenids suenter per esser preparà per la proxima naiv. Quai è er capità il schaner suenter las pli grondas nevadas ch'i ha dà quest enviern. Suenter n'hai dentant strusch pli dà naiv, uschia ch'il chantun n'ha er betg duvrà sal. Quai munta ch'il chantun ha uss d'anvonz anc bunamain 9'000 tonnas sal.

Sal va en malura

Il problem tar il sal per las vias è ch'el è pli umids che sal per cuschinar. Quai munta er ch'el tatga ensemen tar tocca gronda. Quella tocca po lura donnegiar las maschinas il proxim enviern. Perquai sto il sal tant pli sper davent. Il chantun ha vulì dar enavos il sal al producent, quai na saja dentant betg stà pussaivel. Perquai ha el guardà cun ils pasterners. Quels èn lura sa declerads pronts da surpigliar in tant dal sal restant.

Sal tut spezial

Il sal per vias pon ins bain duvrar per cuschinar ed il pasterner da Glion Hubert Caduff va schizunt anc in pass pli lunsch. El è da l'avis ch'il sal da vias è bun per la potenza dals umens. Perquai ha el creà cun il sal in paun da potenza ch'el venda davent dad ussa en sia pasternaria.

RR actualitad 08:00