Siglir tar il cuntegn

Header

Navigaziun

Plirs autos da posta a la staziun da posta a Cuira.
Legenda: Autos da posta a la staziun da posta a Cuira. RTR, G. Hosang
cuntegn

Chantun Auto da posta è cuntent cun autocontrolla

Dapi dus mais na controlla il manischunz da l’auto da posta betg pli mintga bigliet. Ussa vala la autocontrolla. Cun quest midament vul ins evitar retards e simplifitgar il entrar da blera glieud en il bus.

Damain contact cun manischunz

Il midament ha per gronda part chaschunà reacziuns positivas, quai ha envers RTR Riet Denoth, manader da gestiun e producziun tar l’Auto da posta grischun. In grond avantatg saja surtut l’entrar simplifitgà. Main bun saja ch’ils passagiers n'hajan betg pli uschè bler contact cun il manischunz. Tenor Riet Denoth mettan ins tar l’Auto da posta vinavant blera paisa sin il contact persunal ed amiaivel.

Dapli controllas

En l’emprima fasa n'hajan ins betg fatg uschè bleras controllas da bigliets. Quai duai dentant sa midar ils proxims mais. En gruppas da dus vegnia quai a dar controllas en l’auto da posta sco era tar il sortir da l’auto da posta.