Siglir tar il cuntegn

Header

audio
Mezdi: Retrair aua per l’agricultura pon ins be cun consentiment dal chantun
Or da Actualitad dals 26.04.2019.
laschar ir. Durada: 2 minutas 43 Secundas.
cuntegn

Aua per sauar Retrair aua per l’agricultura - be cun consentiment dal chantun

Malgrà che las vischnancas han en il Grischun la suveranitad da l’aua dovri er il consentiment dal chantun sch’i va per retrair aua ord lais, flums e dutgs, per exempel per sauar prads.

Durant la stad da setgira da l’onn passà han purs magari duvrà aua da dutgs e flums per sauar lur ers e prads. Uschia era en Tumleastga. Els sajan stads pertutgads fitg da la setgira cunquai che la Tumleastga saja ina vallada alpina sitga, ha ditg Thomas Bitter da la vischnanca. Perquai hajan purs retratg aua d'auals datiers da lur prads. La vischnanca ha dentant reagì uss ed ha inoltrà ina dumonda da retrair aua tar l’Uffizi chantunal per la natira e l’ambient per uschia sclerir nua ch'i dastgan retrair quant bler'aua.

Avunda aua restanta

Malgrà che las vischnancas decidan davart concessiuns e tgi che dastga retrair aua ord lais e flums ha er il chantun in pled en chapitel. L’Uffizi per la natira e l’ambient controllescha numnadamain ch’i haja avunda aua restanta en ils lieus nua ch’aua vegn retratga. Sche quai è garantì pon els lubir a privats, fatschentas u er ad ovras electricas da far diever da l'aua, uschia declera Remo Fehr, il manader da l’uffizi.

Betg dapli dumondas per retrair aua

Ch’els hajan pervia da las periodas sitgas da l’onn passà gì dapli dumondas per retrair aua per l’agricultura na po Remo Fehr dentant betg constatar. La gronda part da las dumondas da retrair aua stettian anc adina en connex cun pumpas da stgaudar. Sch’insatgi installeschia in tal sistem da stgaudar cun ina pumpa lura dovria quel era aua. La differenza là saja dentant ch'i vegnia retratg aua sutterrana e betg sco tar l’agricultura aua sur terra, pia quella da flums e dutgs. Er ina gronda part da l'aua che vegn duvrada giaja sin il conto da concerns d'energia.

RR actualitad 17.00

Artitgels legids il pli savens