Siglir tar il cuntegn
cuntegn

Chantun Astrofisicher grischun cumprova teoria dad Einstein

Albert Einstein ha sper sia teoria da relativitad era formulà diversas autras teorias. Uschia per exempel la teoria da la «relativitad generala». Da quella n'era Einstein sez betg persvas. Lucas Lombriser e ses team han pudì cumprovar che quella teoria constat.

Lucas Lombriser, l’astrofisicher da 36 onns è stà quatter onns en Scozia. Là han el e ses team lavurà vi da la cumprova da la relativitad generala. Quella pretenda, ditg fitg simpel, che las uschenumnadas «undas da gravitaziun» èn medem spertas sco la glisch. Einstein sez saja gnanc stà persvadì da questa teoria. El haja numnà ella la pli gronda tuppadad da sia carriera, uschia Lombriser.

Ussa, suenter var 100 onns, è dentant cler: Na, Einstein ha puspè ina giada gì raschun!

Energia stgira – in misteri

Fin ussa han ins pensà che probabel ina modificaziun da la gravitaziun declera l’expansiun da l'univers. Cun la cumprova da Lucas Lombriser e ses team è dentant cler che quai n’è betg uschia. Quai che declera numnadamain l’expansiun da l'univers è ina uschenumnada «energia stgira» – e quella è anc adina in grond misteri. Er sche la gronda maioritad da l'univers è energia stgira – nagin sa tge che quella è exact.

Dentant – cun la cumprova da Lucas Lombriser e las mesiraziuns da la NASA, che conferman la cumprova, san ins uss almain en tge direcziun ch’i ha dad ir a partir dad ussa: Chattar ora, tge che quella energia stgira è.

Grazia er a sia cumprova ha Lucas Lombriser survegnì ina professura da promoziun a l’Universitad da Genevra. Quellas vegnan purschidas dal fond naziunal ed èn fitg raras. Qua lavura el ils proxims onns vinavant vid il problem da l’energia stgira – ed emprova da decodar quel grond misteri.

RR Telesguard 17:40