Il chantun accepta uschia la decisiun da la dretgira administrativa dals 1 da settember 2015, che la procedura da la vischnanca burgaisa da Glion da fundar ina associaziun e transferir il possess a quella anc avant la fusiun da la nova vischnanca da Glion, saja stada correcta. Las schanzas che la dretgira federala decidi auter en chaussa sajan memia pitschnas.
Dumonda principala anc betg decidida
Tenor il Departament da finanzas e vischnancas è la dumonda impurtanta pertutgant l’associaziun burgaisa da Glion dentant anc betg sclerida. La dretgira haja sulettamain tractà la dumonda, sche la radunanza da la vischnanca burgaisa saja stada legala e betg, sche las decisiuns da la radunanza sajan stadas legalas.
Per il chantun èn era quellas decisiuns illegalas. La lescha chantunala na prevesi betg pliras organisaziuns burgaisas aifer ina vischnanca politica. Tenor il manader da l’uffizi da vischnancas Thomas Kollegger examinescha il chantun uss las pussaivladads da sclerir la dumonda averta en ina procedura tenor il dretg da surveglianza.
RR novitads 09:00
