Crear mobiglias, interpretar da nov vestgadira tradiziunala, ornaments e decoraziuns ord materials innovativs. Quai ed anc dapli fa part dal artisanadi dal chantun Grischun.
Per rinforzar questa tradiziun veglia e colliar ils producents e producentas dad artisanadi en il chantun è l’uniun «Kunst.Hand.Werk. Graubünden» vegnida fundada igl onn 2013. Questa fin d’emna è l’uniun sa preschentada cun in’exposiziun en la galaria da la citad a Cuira.
Enavos tar la natira, quai plascha era als turists.
La finamira da l’uniun e ses 26 commembers e commembras saja da daventar anc pli gronda e presenta en l’entir chantun Grischun. Alura fiss in proxim pass in center dad artisanadi cun differents ateliers, butias ed exposiziuns, quai ha ditg la suprastanta da l’uniun «Kunst.Hand.Werk.Graubünden», Ricarda Müller envers RTR. In tal center fiss era ina buna idea da promover il turissem en il Grischun, ha manegià ella vinavant.