Siglir tar il cuntegn
cuntegn

Chantun Archiv cultural da dunnas: Istorgias dal cuschinar

L'archiv cultural da dunnas dal Grischun ha organisà in suentermezdi davart il cuschinar. I è dentant betg ì per recepts, mabain per las istorgias davos ils recepts.

Rina Steier-Peduzzi en discurs cun Silke Redolfi, la manadra dal archiv cultural da dunnas dal Grischun.
Legenda: Rina Steier-Peduzzi en discurs cun Silke Redolfi, la manadra dal archiv cultural da dunnas dal Grischun. RTR, Prisca Bundi

Rina Steier-Peduzzi da Savognin è gia da pign ensi adina stada bler en cuschina. Tar sia tatta ch'è stada la cuschiniera dals 'von Salis' a Bondo en Bregaglia haja ella emprendì ina massa, di la dunna dad 83 onns. Er ch'i dat differentas cuschinas - quella dals paupers e quella dals ritgs. A chasa vegneva quai mangià per avair energia da lavurar. En il chastì dals 'von Salis' vegniva quai dentant er mangià pli exclusiv - i deva schizunt in uschenumnà «tea time» raquinta Rina Steier-Peduzzi.

Cuschina è sa midada

Cun ils onns è la fascinaziun restada, la cuschina saja dentant sa midada fitg. Ils products na sajan betg pli uschè purs sco pli baud. Er vegnia quai maschedà chaussas che na giajan simplamain betg, sco per exempel salvgia en la pulenta. Rina Steier-Peduzzi sa pia exact tge che funcziuna e tge betg, tuttina n'è ella betg daventada cuschiniera. Quai na saja betg stà pussaivel da quest temp. Tuttina resta ella er anc oz fidaivla a la cuschina, il pli gugent cuschina ella charn, quai giaja adina, è ella persvasa.

Tar il temas dunnas e cuschina