Siglir tar il cuntegn

Header

Navigaziun

In tschierv en chalur.
Legenda: L'app da chatscha vegn duvrada da bunamain mintga segund chatschadur, ma quai na tanscha betg per finanziar ils custs. RTR
cuntegn

Chantun App «JagdGR» dovra dapli raps

Avant 2 onns ha Daniel Brändle sviluppà ensemen cun Francesco Luminati l’applicaziun da chatscha «JagdGR» . Quai han els fatg or dad atgna iniziativa.

Ussa, 2 onns pli tard, pon ils 2 Puschlavins discurrer d’in success. 2’700 downloads èn vegnids fatgs. Quai vul dir, mintga segund chatschader grischun ha l’applicaziun sin ses telefonin.

Blera lavur per adina pli paucs raps

Per l’applicaziun ston ins pajar ina giada 10 francs. Enfin ussa vegniva uschia regularmain en raps per la lavur per updates ed autras lavurs vi da l’applicaziun.

Cunquai che quels che vulan han l’applicaziun ussa sin il telefonin, vegnan strusch pli novs a chargiar giu l'applicaziun ed uschia na vegn la lavur betg pli pajada. Sulet per la nova versiun da l’applicaziun per questa stagiun da chatscha han ils sviluppaders investì 150 enfin 200 uras da lavur. Senza novas entradas na renda quai insumma betg. Daniel Brändle e Francesco Luminati avevan fatg quint cun dapli sponsurs. Quai n’è dentant betg stà il cas. Els han ussa chattà 2 sponsurs, quai na basta però probablamain betg.

Abunament per l’applicaziun fiss ina soluziun

Cunquai ch'ì vegn strusch pli a dar blers downloads, ed uschia pajaments à 10 francs, vesan ils responsabels da JagdGR la soluziun en in abunament annual. 3 enfin 5 francs vess uschia mintga utilisader da pajar. Daniel Brändle ha gia discurrì cun in u l’auter chatschader e quels han reagì positiv sin quella idea. El saja dentant era conscient ch’els vegnan a perder in u l’auter utilisader.

Chantun sustegna l'applicaziun be cun savida – fin ussa

L’Uffizi da chatscha grischun n’han ils responsabels da l’applicaziun anc betg dumandà per sustegn. «Enfin ussa ha il chantun gidà a nus cun controllar il cuntegn da l’applicaziun. Dentant faschain nus era ponderaziuns da dumandar il chantun per sustegn finanzial. Uschia enavant n’essan nus dentant anc betg» ha ditg Daniel Brändle.