«Il cartel» – cun quai titel ha Republik dilucidà l'istorgia dals cartels en l'Engiadina. In cartel che la cumissiun da concurrenza federala ha constatà e sancziunà. Ina decisiun che betg tuts pertutgads acceptan. L'interpresa Foffa Conrad SA ha en mintga cas annunzià da recurrer cunter la decisiun.
Las retschertgas detagliadas dals schurnalists Anja Conzett e Gion-Mattias Durband sa basan per gronda part sin infurmaziuns d'in infurmant: Adam Quadroni. Lez haja mess en moviment las inquisiziuns da la cumissiun da concurrenza (WEKO).
Il pli concret èn las renfatschas vers il cusseglier guvernativ Jon Domenic Parolini (PBD) ed il manader da gestiun da l'Uniun dals impressaris grischuns Andreas Felix (PBD). Sco president communal da Scuol da lezzas uras, haja Jon Domenic Parolini fatg memia pauc. Ed Andreas Felix haja era fatg part a las sesidas per cunvegnas da pretschs illegalas. Omadus dementeschan ed han piglià posiziun vers las renfatschas.
Durband e Conzett: «Il pievel ha il dretg da savair da quai avant las elecziuns»
Andreas Felix è ì anc pli lunsch. El lascha sclerir giuridicamain las pretensiuns. El ha annunzià dad evaluar las opziuns, e tut tenor purtar plant. Da la politica vegn era renfatschà che Republik fetschia campagna cunter la Partida burgais-democratica essend permez il cumbat electoral. Quai na saja nagina campagna, di Anja Conzett. Il pievel grischun haja però il dretg da savair, co ils candidats per las elecziuns sajan implitgads en questas activitads gia avant las elecziuns.
Conzett e Durband: «L'entschatta eran nus sceptic»
Suenter retschertgas da pliras emnas e pliras verificaziuns dals documents surdads da l'infurmant è il cas per els cler. Passa 60 discurs – per part era confidenzials – hajan els fatg. Quai sper ils documents da l'infurmant. Tut saja plausibel, i dettia naginas cuntradicziuns e Quadroni haja documentà enorm bler cun passa 100 ordinaturs cun acts. Quai sper ils acts uffizials da las decisiuns da la WEKO da fin ussa. L'entschatta sajan era els stads sceptic, ussa saja quai però plausibel.
Bain legal, però tuttina in sbagl
En in punct sa perstgisan ils schurnalists: Adam Quadroni haja bain vulì cumparair cun num e star nà tar sias pretensiuns. Ils nums da l'entira famiglia haja la redacziun però decidì da betg numnar. En l'emprima versiun eran però cumparids era ils nums dals uffants. En quel senn sa perstgisan els tar ils uffants e la mamma, di Anja Conzett.
RR actualitad 08:00